Бас прокуратура Қожамжаровқа қатысты ресми жауап берді

Бұған дейін аталған органдар экс-сенатор, бұрынғы бас прокурор және Экономикалық және сыбайлас жемқорлыққа қарсы күрес агенттігінің (Қаржы полициясы, Финпол) экс-басшысы Қожамжаровқа қатысты ұзақ уақыт бойы үнсіздік сақтап келген болатын.

– Қазіргі уақытта бұрынғы қаржы полициясы қызметкерлеріне қатысты сотқа дейінгі тергеу жалғасуда. Қосымша дәлелдемелер жинауға бағытталған тергеу әрекеттері жүргізілуде, – деп хабарлады Бас прокуратура ресми түрде.

Ал ҰҚК өз жауабында Қожамжаровтың жақын серіктері болған экс-финпол қызметкерлеріне қатысты сотқа дейінгі тергеу комитет тарапынан жүргізілмейтінін мәлімдеді.

Қазіргі уақытта Қожамжаровқа жақын бірнеше адам тергеуде:

• Сыбайлас жемқорлыққа қарсы іс-қимыл ұлттық бюросының бұрынғы басшысы Талғат Тәтібаев екі айға қамауға алынған;
• Бас прокуратураның арнайы прокурорлар қызметінің экс-басшысы Олеся Кексель де тергеуде.

Екеуі де Қожамжаровтың ең сенімді серіктері ретінде танылған. Тағы бір танымал тұлға — Қаржы полициясының бұрынғы қызметкері Талғат Махатов (жедел лақап аттары – «Саныч» және «Бетон»). Ол кеден қызметкері Медет Жамашевты – “Хоргос ісі” бойынша басты куәні – өлтіруге тапсырыс берді деген айыппен ұзақ мерзімге сотталған. Жақында оған тағы бір қылмысы үшін қосымша жаза тағайындалып, ол енді жалпы 24 жылын түрмеде өткізетін болды.