Трамп Украинаға Patriot зымырандарын өндіруге қатысты ұстанымын өзгертті

Оның айтуынша, Вашингтон Украинаға мұндай зымырандарды өндіруге лицензия беруге әлі келісім берген жоқ. Бұл бұған дейін Трамптың Киевке осындай құқық беруге уәде еткенімен қайшы келеді.

Кэмп-Дэвидте өткен АҚШ үкіметінің отырысында сөйлеген Трамп зымыран технологияларын басқа елге беру аса маңызды шешім екенін айтты.

– Біз бұған келіскен жоқпыз. Бұл мәселені әлі талқылап жатырмыз, – деді АҚШ президенті.

Ол сондай-ақ Вашингтонның сақтық танытуы қажет екенін айтып, өзге елге берілген технологиялар болашақта АҚШ-тың өзіне қарсы қолданылуы мүмкін екенін жеткізді. Соған қарамастан, бұл мәселе бойынша келіссөздер жалғасып жатқанын атап өтті.

Еске салайық, 8 шілдеде Анкарада өткен НАТО саммитінде Украина президенті Владимир Зеленскиймен кездесуден кейін Трамп Киевке лицензия беруге және Patriot зымырандарын Украина аумағында өндіруді ұйымдастыруға көмектесуге уәде еткен болатын. Ол кезде АҚШ президенті Украина мұндай өндірісті қысқа мерзімде іске қоса алатынын мәлімдеген еді.

Украина Ресейдің күшейген шабуылдары мен әуе қорғанысы жүйелеріне арналған оқ-дәрі тапшылығы жағдайында өз аумағында PAC-3 зымырандарын бірлесіп өндіру туралы келісімге қол жеткізуге ұмтылып отыр.

Трамптың бастапқы мәлімдемесінен кейін Украина өкілдері Пентагонмен және америкалық қорғаныс компанияларымен келіссөздерді бастаған. Сондай-ақ Lockheed Martin компаниясының өкілдері Зеленскиймен кездесіп, Украинаға сапарлауды жоспарлаған. Алайда лицензияны беру жөнінде түпкілікті шешім әлі қабылданған жоқ.