Бас мүфти қазақстандықтарды Құрбан айтты ұлттық нақышта атап өтуге шақырды

ҚМДБ баспасөз қызметінің мәліметінше, елордада өткен баспасөз мәслихатында Бас мүфти халықты ұлттық киім киіп, Айт мерекесін қазақы дәстүрмен өткізуге және қайырымды бастамаларға белсенді қатысуға шақырған.

Наурызбай қажы Тағанұлының айтуынша, облыстық, қалалық және аудандық мешіттердің аумағында киіз үйлер тігіліп, ұлттық спорт түрлерінен жарыстар ұйымдастырылады. Сонымен қатар мәдени-рухани кештер өткізу жоспарланған.

Осыған байланысты Бас мүфти ел мұсылмандарын ұлттық құндылықтарды насихаттап, Құрбан айтты салт-дәстүрге сай қарсы алуға үндеді.