АҚШ пен Иран 19 маусымда Швейцарияда бейбіт келісімге қол қоюы мүмкін
АҚШ пен Иран арасындағы бейбіт келісімге 19 маусым күні Швейцарияда қол қойылады.
Бұл туралы келіссөздерге арағайындық жасап отырған Пәкістан премьер-министрі Шахбаз Шариф мәлімдеді. Ақпаратты АҚШ президенті Дональд Трамп те растаған.
Шарифтің айтуынша, тараптар қақтығысты дипломатиялық жолмен шешуге дайын екенін көрсеткен. Ол сондай-ақ келіссөздерге арағайындық жасаған Катарға, сондай-ақ Сауд Арабиясы мен Түркияға алғыс білдірді.
«Келісімге қол жеткізілгеннен кейін делдалдар осы аптада бірқатар кездесулер ұйымдастырады. Бұл кездесулер техникалық келіссөздер мен ресми қол қою рәсіміне дайындық болады», – деді Пәкістан үкіметінің басшысы.
Трамп Ормуз бұғазындағы блокаданы алып тастайтынын мәлімдеді
Дональд Трамп өзінің Truth Social әлеуметтік желісіндегі парақшасында Иранмен бейбіт келісім жасалғанын хабарлады.
«Мен Ормуз бұғазын әлемдік кеме қатынасы үшін ашуға және АҚШ әскери-теңіз күштерінің теңіз блокадасын дереу тоқтатуға рұқсат беремін. Әлемнің барлық кемелері қозғалысты бастасын. Мұнай қайтадан еркін ағатын болады», – деп жазды ол.
АҚШ вице-президенті Джей Ди Вэнс келісімге қол қою рәсіміне қатысуды жоспарлап отырғанын айтты. Оның сөзінше, Женевадағы кездесуге Трамптың өзі де келуі мүмкін.
Келісім Ливан мәселесін де қамтуы мүмкін
Шахбаз Шарифтің мәлімдеуінше, АҚШ пен Иран барлық бағыттағы әскери әрекеттерді, соның ішінде Ливан аумағындағы қақтығыстарды тоқтатуға келіскен.
Бұл мәселе Иран үшін маңызды шарттардың бірі болған. Себебі Ливанда Израиль мен Тегеран қолдайтын Хезболла қозғалысы арасында қақтығыстар жалғасып келеді.
14 маусым күні Израиль Бейруттың «Хезболла» бақылауындағы аудандарына кезекті әуе соққыларын жасаған. Осыған байланысты Трамп Израиль премьер-министрі Биньямин Нетаньяхуны сынға алды.
Иран меморандумға қол қойылатынын растады
Иран Сыртқы істер министрінің орынбасары Казем Гарибабади АҚШ-пен келісімдердің бекітілетінін мәлімдеді. Оның айтуынша, әзірге тараптар толыққанды бейбіт келісім емес, «өзара түсіністік туралы меморандумға» қол қояды.
Гарибабадидің сөзінше, одан кейін 60 күн бойы түпкілікті бейбіт келісім бойынша келіссөздер жалғасады. Осы кезеңде Иран меморандум талаптарының орындалуын мұқият бақылайды.
Ал Дональд Трамп бұл келісімді «өзіне дейін ешкім қол жеткізе алмаған тарихи жетістік» деп бағалады.
«Өңір басшылары алғаш рет шынайы бейбітшілікке қол жеткізуге көмектесе алатын президентті тапты», – деп жазды Трамп.
