АҚШ-та Трамптың Иранға қатысты мәлімдемесі сынға ұшырады
Дональд Трамп Конгреске жолдаған хатында Иранға қарсы әскери іс-қимылдардың аяқталғанын мәлімдеген еді.
Оның айтуынша, 2026 жылғы 7 сәуірден бері АҚШ пен Иран қарулы күштері арасында бірде-бір атыс тіркелмеген. Сондай-ақ президент 28 ақпанда басталған қақтығыстар тоқтатылғанын атап өтті. Дегенмен, америкалық әскердің Таяу Шығыс аймағында қала беретінін жеткізді.
Алайда бұл мәлімдеме АҚШ-та бірауыздан қолдау тапқан жоқ. АҚШ Сенаты құрамындағы демократтар өкілдері президенттің сөздеріне күмән келтіріп отыр. Демократиялық азшылықтың жетекшісі Чак Шумер X әлеуметтік желісіндегі парақшасында Трамптың мәлімдемесін «толықтай сандырақ» деп атады.
Оның пікірінше, Иранға қатысты әскери әрекеттер заңсыз сипатқа ие және жағдай әлі де қауіпті.
«Бұл – заңсыз соғыс. Республикашылдар оны қолдап отырған сайын, адамдардың өмірі қауіпке тігіліп, тұрақсыздық күшейе береді, ал баға өсімі қарапайым америкалықтардың қалтасына салмақ түсіруде», – деп жазды сенатор.
Бұған қоса, бірқатар бұқаралық ақпарат құралдары Иран төңірегіндегі ахуалдың АҚШ ішіндегі экономикалық жағдайға да әсер етіп жатқанын хабарлайды. Атап айтқанда, жанармай мен азық-түлік бағасының тұрақты өсуі тұрғындардың тұрмысына кері ықпал етуде.
Осылайша, Трамптың соғыс аяқталды деген мәлімдемесі ел ішінде саяси пікірталасты күшейтіп, жағдайдың нақты бағасына қатысты түрлі көзқарастардың бар екенін көрсетті.
