Ақтөбе облысында ауылдық инфрақұрылымды дамыту жұмыстары жалғасуда
Ақтөбе облысында ауыл тұрғындарының өмір сүру сапасын жақсартуға бағытталған әлеуметтік және инженерлік инфрақұрылым жобалары кезең-кезеңімен жүзеге асырылып келеді. Білім беру нысандарын салу, елді мекендерді сапалы ауыз сумен қамту және коммуналдық желілерді жаңғырту өңірдегі негізгі басымдықтардың бірі саналады.
Осы бағыттағы жұмыстармен танысу мақсатында облыс әкімі Асхат Шахаров Мәртөк ауданына жұмыс сапарымен барып, бірқатар әлеуметтік нысандарды аралады.
Сапар барысында өңір басшысы алдымен Сарыжар ауылындағы «Келешек мектептері» ұлттық жобасы аясында салынған жаңа мектептің жұмысымен танысты. 300 орындық білім беру нысаны өткен жылы пайдалануға берілген. Мектеп заманауи кабинеттермен, зертханалармен және оқушылардың жан-жақты дамуына қажетті құрал-жабдықтармен қамтамасыз етілген.
Облыс әкімінің айтуынша, өңірде білім беру инфрақұрылымын дамытуға ерекше көңіл бөлінуде. Соңғы жылдары «Келешек мектептері» ұлттық жобасы шеңберінде 14 жаңа мектеп салынып, 10 мыңнан астам оқушы орны ашылған. Бұл білім беру ұйымдарындағы орын тапшылығын азайтып, балалардың сапалы білім алуына мүмкіндік беріп отыр.
Сарыжар ауылының тұрғындары да жаңа мектептің ашылуы ауыл өміріндегі маңызды өзгерістердің бірі болғанын атап өтті. Олардың пікірінше, қазіргі заманғы білім беру мүмкіндіктері ауыл мен қала арасындағы білім сапасының алшақтығын азайтуға ықпал етеді.
Жұмыс сапары барысында Асхат Шахаров Кенсахара ауылына да барып, ауыз су желілерін қайта жаңғырту жобасының жүзеге асу барысын көрді. Жоба аясында ұзындығы 7 шақырым болатын су құбыры желісі жаңартылып, 680 тұрғынды сапалы ауыз сумен қамту көзделген.
Қазіргі уақытта құрылыс жұмыстары жүргізілуде. Жоба шеңберінде су сақтау резервуарларын салу және сумен жабдықтау жүйесін толық жаңарту жоспарланған. Өңір басшысы мердігер ұйымдарға жұмыстарды белгіленген мерзімде әрі сапалы аяқтау міндетін жүктеді.
Облыста ауылдық инфрақұрылымды дамыту бағытындағы жұмыстар жүйелі түрде жалғасуда. Бүгінде өңірдегі газдандыру деңгейі 95 пайызға жеткен. Сонымен қатар жол құрылысы, сумен жабдықтау және коммуналдық желілерді жаңғырту бойынша жаңа жобалар іске асырылуда. Алдағы екі жыл ішінде қажетті инфрақұрылыммен толық қамтылмаған елді мекендердегі мәселелерді кезең-кезеңімен шешу жоспарланып отыр.
Кенсахара ауылында облыс әкімі 100 орындық жаңа мектептің құрылысымен де танысты. Қазіргі кезде нысанда ішкі әрлеу жұмыстары жүргізілуде. Мамандардың мәліметінше, құрылыс жұмыстарының дайындық деңгейі шамамен 70 пайызды құрайды. Жобаны биыл аяқтап, пайдалануға беру көзделген.
Мамандардың айтуынша, білім беру және коммуналдық инфрақұрылымды дамыту ауылдық аумақтардың тұрақты дамуына, тұрғындардың өмір сапасын арттыруға және жастардың туған жерінде сапалы білім алуына қолайлы жағдай жасауға мүмкіндік береді.
