АҚШ-тың әскери-теңіз күштерінде 3500 сарбаздан коронавирус табылған
Пентагон Кариб теңізінде АҚШ әскери-теңіз күштеріне тиесілі эсминецте коронавирус ошағы анықталғанын, бір теңізшінің эвакуацияланғанын растады.
24 сәуірде Пентагондағы баспасөз мәслихаты кезінде Kidd тобындағы эсминецте инфекция таралғаны туралы ақпарат ресми түрде расталды. "Америка дауысы" сайтының жазуынша, инфекция таралғаны туралы ақпаратты бірінші болып Reuters агенттігі хабарлаған. Пентагондағы құпия дереккөзге сүйенген агенттік оннан астам теңізшіден вирус табылғанын жариялаған еді.
Эсминец экипажы Кариб теңізінде есірткі трафигімен күрес бойынша тапсырма орындаған.
CNN арнасының хабарлауынша, АҚШ әскери-теңіз күштерінің 26 кемесінде теңізшілерден коронавирус табылған. Бұл кемелердің барлығы қазір порттарда немесе жөндеуге жіберілген.
АҚШ-тың қорғаныс министрлігі коронавирус жұққан теңізшілер мен кемелер саны туралы айтпады. CNN телеарнасының хабарлауынша, 3578 америкалық сарбаздан коронавирус табылған. Екеуі қайтыс болған. "Теодор Рузвельт" ұшақ тасығышында 800 теңізшіден коронавирус табылған. Бір адам қайтыс болған.
LIVE Коронавирус Қазақстандағы және әлемдегі жағдай
