Ер адам бұрынғы сүйіктісін тұншықтырып өлтіріп, ақшасын досының шотына аударған
Биыл қаңтарда әлеуметтік желі арқылы танысқан қыз бен жігіт кездесіп жүре бастаған. Кейін қыз қарым-қатынасты тоқтатуға шешім қабылдап, Таиландқа ұшуды жоспарлаған.
4 ақпанда олар қайта кездесіп, қыз құрбысының пәтеріне барған. Сот материалдарына сәйкес, сол жерде ер адам оны тұншықтырып өлтірген. Қылмыстан кейін ол қыздың банк шотындағы ақшаны досына аударып, такси шақырып, оқиға орнынан кеткен. Ақшаның не үшін түскенін сұраған танысына ер адам, мәлімет бойынша, смайликпен жауап берген.
Келесі күні ол досынан ақшаны қолма-қол шешіп алуды өтініп, Таразға кетпек болған. Алайда жолда полиция қызметкерлері оны ұстады. Бұл кезде марқұмның денесін әпкесі мен құрбысы тауып алған еді.
Ер адам ақшаны иемденгенін мойындағанымен, кісі өлтіру айыбын абайсызда адам өліміне әкеп соғу бабына ауыстыруды сұраған. Алайда сот оның уәжін қабылдамай, 10 жылға бас бостандығынан айырды.
Үкім заңды күшіне енген. Марқұмның әпкесі тағайындалған жазаны тым жеңіл деп санайды.
