Астанада шетелдік студенттерге Қазақстан заңнамасы мен киберқауіпсіздік талаптары түсіндірілді
Қазақстанда "Заң мен тәртіп" қағидатын жүзеге асыру, құқықтық мәдениетті қалыптастыру және қоғамдық қауіпсіздікті нығайту бағытындағы жұмыстар жүйелі түрде жалғасып келеді.
Осы мақсатта Астанада шетелдік студенттерге арналған профилактикалық кездесу ұйымдастырылды.
Астана медицина университетінде шетелден келіп білім алып жүрген студенттердің құқықтық сауаттылығын арттыруға және олардың қауіпсіздігін қамтамасыз етуге бағытталған ақпараттық-түсіндіру іс-шарасы өтті. Бұл туралы елорда әкімдігінің ресми сайты хабарлады.
"Заң мен тәртіп" тұжырымдамасы аясында ұйымдастырылған кездесуге қалалық прокуратура, полиция департаменті және жоғары оқу орнының басшылығы қатысты. Жиында Қазақстан Республикасының көші-қон заңнамасын сақтау, шетел азаматтарының құқықтары мен міндеттері, құқық бұзушылықтардың алдын алу және интернеттегі алаяқтықтан қорғану мәселелері кеңінен талқыланды.
Іс-шара барысында құқық қорғау органдарының өкілдері студенттерге елімізде уақытша тұру және білім алу кезінде сақталуы тиіс негізгі заң талаптарын түсіндірді.
Астана қаласы Полиция департаменті Көші-қон қызметі басқармасы бастығының орынбасары, полиция подполковнигі Алтынбек Масақбаев шетелдік азаматтардың Қазақстан аумағындағы құқықтық мәртебесіне тоқталды. Ол студенттердің заңмен белгіленген құқықтары мен міндеттерін, сондай-ақ көші-қон талаптарын бұзған жағдайда туындайтын жауапкершілік мәселелерін баяндады.
Ал Сарыарқа ауданы прокуратурасы бөлімінің прокуроры Қасымжомарт Бейсенбай шетел азаматтарының елімізде болу тәртібін реттейтін қолданыстағы заң нормаларын түсіндірді. Кездесуде заң талаптарын сақтау құқықтық мәселелердің алдын алудың маңызды шарты екені атап өтілді.
Жиынның тағы бір маңызды бағыты цифрлық қауіпсіздікке арналды. Астана қаласы Полиция департаментінің Киберқылмысқа қарсы іс-қимыл басқармасының қызметкерлері, полиция капитаны Айдар Қонысбек пен полиция майоры Денис Бондаренко интернет кеңістігінде жиі кездесетін алаяқтық тәсілдері туралы ақпарат берді.
Мамандар студенттерге күмәнді интернет сілтемелері, жалған хабарламалар, банк қызметкері немесе мемлекеттік орган өкілі болып хабарласатын алаяқтардан сақтану жолдарын түсіндірді. Сонымен қатар жеке мәліметтерді, банк картасының деректерін және SMS арқылы келетін растау кодтарын бөгде адамдарға бермеу қажеттігі ескертілді.
Университеттің Әлеуметтік-тәрбие жұмысы департаментінің директоры Зауреш Нақыповна шетелдік студенттердің көші-қон құжаттарын рәсімдеу кезінде жиі кездесетін мәселелеріне тоқталды.
Оның айтуынша, студенттер арасында визаны ұзарту мерзімін өткізіп алу, қажетті құжаттарды толық жинамау немесе Қазақстанда болу мерзіміне қатысты талаптарды дұрыс түсінбеу жағдайлары кездеседі.
Осыған байланысты жоғары оқу орны шетелдік білім алушыларға виза мерзімі аяқталғанға дейін алдын ала қамдануды ұсынады. Атап айтқанда, студенттерге құжаттарын уақытылы рәсімдеу үшін визаны ұзартуға 45 күн қалғанда университеттің халықаралық бөліміне жүгіну жөнінде кеңес берілді.
Сондай-ақ университеттің ресми сайтында шетелдік студенттерге арналған виза мәселелері бойынша ағылшын тіліндегі арнайы ақпараттық жадынама орналастырылған.
Кездесу барысында интернет алаяқтарының әрекеттерінен қорғану мәселесіне де ерекше көңіл бөлінді. Университет өкілінің айтуынша, шетелдік студенттер фишингтік хабарламаларға, жалған телефон қоңырауларына және ақша аударуды талап ететін күмәнді ұсыныстарға тап болуы мүмкін.
Мұндай жағдайда цифрлық қауіпсіздіктің қарапайым ережелерін сақтау маңызды. Атап айтқанда, ешкімге жеке құпиясөздерді, банк картасының деректерін, бір реттік растау кодтарын бермеу және күмәнді сілтемелерді ашпау қажет.
Университет басшылығы студенттер арасында құқық бұзушылықтардың алдын алу мақсатында ақпараттық-түсіндіру жұмыстарын тұрақты түрде жүргізетінін жеткізді. Мұндай кездесулерде Қазақстан заңнамасының негізгі талаптарымен қатар, жатақханада тұру тәртібі, қоғамдық орындардағы мінез-құлық ережелері және жеке қауіпсіздік мәселелері қамтылады.
Егер шетелдік студент құқықтық қиындыққа тап болса немесе алаяқтық әрекеттің құрбанына айналса, университеттің шетелдік студенттермен жұмыс жөніндегі деканатына немесе халықаралық ынтымақтастық бөліміне хабарласып, қажетті көмек ала алады.
Айта кетейік, білім беру ұйымдарында өткізілетін осындай профилактикалық іс-шаралар "Заң мен тәртіп" қағидатын ілгерілетуге, жастардың құқықтық сауаттылығын арттыруға және құқық бұзушылықтарға нөлдік төзімділік көзқарасын қалыптастыруға бағытталған.
Сонымен бірге мұндай бастамалар "Қауіпсіз қоғам" жобасының мақсаттарымен үндесіп, шетелдік студенттердің Қазақстандағы білім беру ортасына бейімделуіне, құқық қорғау органдарымен өзара байланысын нығайтуға және қауіпсіз білім алуына жағдай жасауды көздейді.
