Астанада туберкулезбен ауырған медбике жұмыс істеген балалар ауруханасында бір жасар балаға туберкулез жұқты
Астанада бір жасар баладан туберкулез анықталғаннан кейін арнайы комиссия құрылды.
Бұл ақпаратты елорданың Қоғамдық денсаулық сақтау басқармасы растады. Оқиғаның мән-жайын анықтау үшін комиссия құрамына педиатр, фтизиатр, пульмонолог, сондай-ақ сәулелік және функционалдық диагностика саласының мамандары енгізілді.
Бұл жағдай туралы алғаш болып баланың әпкесі Threads әлеуметтік желісінде жазды. Оның айтуынша, жиені №1 қалалық балалар ауруханасында ашық түрдегі туберкулезбен ауырған медбике жұмыс істеген кезде инфекция жұқтырған.
Оның сөзінше, компьютерлік томография баладан туберкулезді растаған. Сондай-ақ ол Денсаулық сақтау министрлігіне жұқпалы аурумен ауырған қызметкердің медициналық мекемеде қалай жұмыс істегенін түсіндіруді сұраған.
Астана қаласының Денсаулық сақтау басқармасы бұл дерек бойынша тексеру басталғанын хабарлады.
Тергеуге Денсаулық сақтау министрлігінің Ұлттық фтизиопульмонология ғылыми орталығы мен Астананың санитариялық-эпидемиологиялық бақылау департаментінің мамандары да тартылады.
Бұған дейін №1 қалалық балалар ауруханасында жұмыс істеген медбикеден шынымен туберкулез анықталғаны белгілі болған. Бұл ақпаратты Денсаулық сақтау басқармасы растаған.
Медбике соңғы рет 24 сәуірде жұмысқа шыққан. Қазір ол Қалалық фтизиопульмонология орталығында ем қабылдап жатыр.
Инфекция анықталғаннан кейін соңғы үш айдағы байланыста болған адамдардың тізімі жасалды. Соңғы флюорографиялық тексеруден кейін алты айдан астам уақыт өткен 39 қызметкер қайта тексеруден өтті. Басқарма мәліметінше, олардың барлығының нәтижесі теріс болған.
Алайда балаларды қоса алғанда басқа байланыста болған адамдардың тексеру қорытындылары туралы ақпарат берілмеді.
Оқиғадан кейін ауруханада төсек-орын жабдықтары мен матрастарға толық дезинфекция жүргізілген.
