Эфиопиялық ғалым Тоқаевтың Жолдауына пікір білдірді: Қазақстанмен ғылыми ынтымақтастықты кеңейтуге мүмкіндік бар
Эфиопиялық ғалым Тоқаевтың Жолдауына пікір білдірді
Эфиопиядағы Оромия мемлекеттік университеті директорының орынбасары, доктор Мулета Хусейн Садето Қазақстан президенті Қасым-Жомарт Тоқаевтың 28 қазандағы Жолдауына пікір білдірді. Ол құжатта ғылым, білім, цифрландыру және жасанды интеллект мәселелеріне басымдық берілгенін атап өтіп, Қазақстан мен Эфиопия арасындағы академиялық ынтымақтастықты кеңейту мүмкіндіктеріне тоқталды.
– Қазақстан Республикасының Президенті Қасым-Жомарт Тоқаевтың 2026 жылғы 28 қазанда жасаған Жолдауы елдің жаңа тарихи дәуірдегі дамуының өршіл әрі болашаққа бағдарланған пайымын айқындайды. Президенттің тұрақты экономикалық өсу мен ұлттық бәсекеге қабілеттіліктің маңызды қозғаушы күштері ретінде ғылымға, білімге, цифрлық трансформацияға және жасанды интеллектке ерекше назар аударуының маңызы зор.
Жоғары білім беру саласының тұрғысынан қарағанда, бұл Жолдауды ерекше өзекті деп санаймын, өйткені ол елдің ұзақ мерзімді әл-ауқаты тек экономикалық ресурстар мен инфрақұрылымға ғана емес, сонымен қатар халықтың біліміне, дағдылары мен инновациялық әлеуетіне де байланысты екенін мойындайды. Президент Тоқаевтың технологиялық тұрғыдан дамыған экономиканы қалыптастыруға және ғылым мен білімнің рөлін күшейтуге баса мән беруі қазіргі замандағы адами капиталдың іргелі маңызын терең түсінетінін көрсетеді.
Қазақстанның цифрлық экономиканы құруға және жасанды интеллектті әр түрлі салаларда тәжірибе жүзінде қолдануды кеңейтуге деген ұмтылысы ерекше қызығушылық тудырады. Бұл басымдықтар елдің қарқынды технологиялық өзгерістерге бейімделуге және өз азаматтарына, әсіресе жастарға жаңа мүмкіндіктер жасауға деген табандылығын көрсетеді. Бұл үдерісте университеттер білікті маман даярлау, ғылыми зерттеулерді насихаттау және кәсіпкерлік пен сын тұрғысынан ойлауды дамыту арқылы маңызды рөл атқарады.
Сондай-ақ Президенттің заманауи инфрақұрылымды дамытуға, білім сапасын жақсартуға және тұрғылықты жеріне қарамастан азаматтарға тең мүмкіндіктер жасауға қатысты бастамаларын құптаймын. Білім, ғылым және әлеуметтік инфрақұрылымға инвестиция құю инклюзивті дамуға елеулі үлес қосып, экономикалық жаңғыртудың игіліктерін қоғамның кең қабаттарының көруін қамтамасыз ете алады.
Жолдауда инновацияның, технологиялық тәжірибенің және жоғары білікті мамандарды даярлаудың маңыздылығы тағы да атап көрсетілген. Осы орайда университеттер, ғылыми-зерттеу институттары мен жеке сектор арасындағы ынтымақтастықты нығайтудың маңызы ерекше. Мұндай серіктестік ғылыми білімді практикалық шешімдерге айналдыруға, жаңа салалардың дамуын қолдауға және ұлттық экономикалардың бәсекеге қабілеттілігін арттыруға көмектеседі.
Эфиопиялық көзқарас тұрғысынан алғанда, Қазақстанның даму басымдықтары жоғары білім беру, цифрландыру, ғылыми зерттеулер және жастарды дамыту салаларында тәжірибе алмасу үшін құнды мүмкіндіктер ұсынады. Эфиопия мен Қазақстанның академиялық байланыстарды кеңейтуге, оқытушылар мен студенттер алмасуын ынталандыруға, бірлескен зерттеу бастамаларын дамытуға және білім беру мен мемлекеттік басқаруда цифрлық технологияларды қолданудың үздік тәжірибелерімен бөлісуге зор әлеуеті бар.
Эфиопия және қазақстандық университеттер арасындағы тығыз ынтымақтастық тұрақты академиялық серіктестік құруға және елдеріміз арасындағы кең ауқымды қарым-қатынастарды нығайтуға үлес қосады деп сенемін. Ақпараттық технологияларға, жасанды интеллектке, ауыл шаруашылығындағы инновацияларға, инженерияға және еңбек нарығының өзгеретін талаптарына сай кәсіби дағдыларды дамытуға ерекше назар аударуға болады.
Қорытындылай келе, Президент Тоқаевтың Жолдауы білім, ғылым, инновация және жауапты басқару болашақ прогрестің негізі болып табылатын ұлттық дамудың пайымын ұсынады. Оның адамдарға инвестиция құюға және жас буынды цифрлық дәуірдің сынақтарына дайындауға баса назар аударуының мәні айрықша. Университеттер үшін бұл олардың миссиясы тек білім берумен шектелмейтінін, олардың сонымен бірге зерттеу, инновация және халықаралық ынтымақтастық орталығы ретінде қызмет етуі тиіс екенін айқын еске салады.
Қазақстанның одан әрі жаңғыруы және оның халықаралық академиялық серіктестігінің кеңеюі Қазақстан мен Эфиопия арасындағы өзара тиімді ынтымақтастық үшін жаңа мүмкіндіктер ашатынына сенімдімін.
