Щучинскідегі дәмханада 12 адамның өмірін қиған өртке қатысты сот үкімі өзгеріссіз қалды
Ақмола облысының Щучинск қаласындағы кафеде 12 адамның өмірін қиған өртке байланысты сотталғандарға шығарылған үкім күшінде қалды.
Облыстық сот апелляциялық шағымды қарағаннан кейін кафе иесі мен газ құю станциясының директорына тағайындалған жеті жылдық, ал газ жеткізушіге берілген алты жылдық жаза өзгеріссіз қалдырылды.
Қайғылы оқиға 2026 жылғы 25 ақпанда болған. Өрт салдарынан 12 адам қаза тауып, тағы 11 адам түрлі дәрежеде жарақат алған.
Тергеу мәліметінше, кафе иесі газ баллондарын жылыту радиаторларының жанына сақтаған. Бұл өрт қауіпсіздігі талаптарын бұзу болып саналады. Сонымен қатар мекеме қызметкерлері газ жабдықтарын пайдалану жөнінде нұсқамадан өтпеген.
Ал екінші сотталған азамат кафеге газды заңсыз жеткізумен айналысқан. Қайғылы оқиға болған күні ол екі баллон әкелген, оның бірі шамадан тыс толтырылған. Газ құю станциясының директоры да қажетті құжаттарсыз, арнайы жабдық пен толтыру деңгейін бақылайтын құралдарсыз тұрмыстық баллондарға газ құйып, оны жүйелі түрде сатып келген.
Сот анықтағандай, шамадан тыс толтырылған баллон жылыту радиаторының жанында қызып, ішіндегі қысым артқан. Соның салдарынан баллонның қабырғасы жарылып, өрт шыққан.
