Bloomberg: Ресей Украинадағы соғысты ушықтыруға дайындалып жатыр
Мәскеу Украинадағы соғысты тоқтату жөніндегі келіссөздер тығырыққа тірелді деп есептейді және енді әскери қимылдарды күшейту арқылы өз мақсаттарына жетуді көздеп отыр.
Бұл туралы Кремльге жақын дереккөздер Bloomberg агенттігіне мәлімдеген.
Агенттік мәліметінше, Ресей қазір Киевке, оның ішінде қаланың орталық аудандарына ядролық емес оқтұмсықпен жабдықталған баллистикалық зымырандар арқылы соққыны күшейту мүмкіндігін қарастырып жатыр. Украинаның өзге қалаларындағы инфрақұрылым нысандары да ықтимал нысана ретінде аталады.
Bloomberg дереккөздерінің пікірінше, Ресей экономикасына жасалып жатқан санкциялық қысым мен Украинаның Ресейдегі мұнай өңдеу зауыттары және логистикалық орталықтарға жасаған шабуылдары Владимир Путинді соғысты тоқтатуға мәжбүр етпейді.
Мәскеу Украинаның Ресей аумағына жасаған соққыларын барған сайын НАТО елдерінің шабуылы ретінде қабылдай бастаған. Бұған альянс мүшелерінің Киевке қару-жарақ пен барлау ақпаратын беруі себеп болып отыр.
«Қазіргі сипаттағы әскери іс-қимылдар эскалацияның шарықтау шегі емес», – дейді агенттік дереккөздері.
"ЦРУ" басшысының Мәскеуге сапары
25 тамызда АҚШ Орталық барлау басқармасының директоры Джон Рэтклифф Мәскеуге барды. Оның ресейлік өкілдермен келіссөзінде қандай мәселелер талқыланғаны әзірге белгісіз.
Бұған дейін АҚШ президентінің арнайы өкілі Стив Уиткофф пен Дональд Трамптың күйеу баласы Джаред Кушнер сегіз айлық үзілістен кейін Мәскеуге қайта келуі, сондай-ақ алғаш рет Киевке баруы мүмкін екені хабарланған. Алайда бұл сапарлардың нақты мерзімі жарияланған жоқ.
Bloomberg-тің Кремльге жақын төрт дереккөзі дипломатиялық әрекеттерден нәтиже шықпаған жағдайда Мәскеу өз мақсатына жетудің басқа жолын көрмей, соғысты одан әрі ушықтыруға баруы мүмкін екенін айтқан.
Ресей тарапы Уиткофф пен Кушнер Мәскеуге бейбіт келісімге қатысты жаңа ұсыныстар алып келеді деп үміттенгенімен, келіссөздерде айтарлықтай ілгерілеу болады деген сенім төмен.
Дереккөздердің айтуынша, Мәскеу бұған дейін бірқатар ымыраға бардық деп есептейді және бұдан кейінгі кез келген шегініс Ресейдің келіссөздердегі позициясын әлсіретеді деген ұстанымда.
Тактикалық ядролық қару қолданылуы мүмкін бе?
Bloomberg мәліметінше, кейбір ресейлік шенеуніктер Ресей мен Украинаның бір-бірінің логистикалық нысандарына, сондай-ақ Қара теңіздегі порттар мен кемелерге шабуылдары жалғаса берсе, жағдай одан әрі шиеленісуі мүмкін екенін жоққа шығармайды.
Агенттік Мәскеудегі «қатаң бағытты» жақтаушылар арасында тактикалық ядролық қару қолдану туралы ұсыныстар жиірек айтыла бастағанын жазады.
Алайда сарапшылар мұндай сценарийдің ықтималдығын өте төмен деп бағалайды.
Карнегидің Ресей және Еуразияны зерттеу жөніндегі Берлин орталығының директоры Александр Габуевтің пікірінше, қазіргі соғыс жағдайында тактикалық ядролық қарудың әскери тиімділігі шектеулі. Ал ядролық қаруды қолданбау жөніндегі қалыптасқан халықаралық қағиданы бұзудың саяси салдары Ресей үшін өте ауыр болуы мүмкін.
«Мәскеудің кәдімгі қару-жарақ арқылы қақтығысты ушықтыру мүмкіндігі, соның ішінде зымыран соққыларын күшейту мүмкіндігі бар кезде, ядролық шектен өтуіне іс жүзінде себеп жоқ», – дейді сарапшы.
Bloomberg осылайша Мәскеу мен Киев арасындағы соғыс жаңа эскалация кезеңіне өтуі мүмкін екенін, бірақ ядролық қару қолдану қаупі әзірге төмен болып отырғанын жазады.
