Германиядан келген бизнес-джетте болған жеті адамнан вирус табылды
13 наурызда Қазақстанға Германиядан ұшып келген жеке борттағы 12 адамның жетеуінен коронавирус табылды.
Бұл туралы 25 наурызда Алматы қаласы қызметтер мен сапаны бақылау департаменті хабарлады.
Департаменттің дерегінше, вирус жұқтырғандардың алтауы – жолаушы, біреуі – бортсеріктес.
Қазақстанда коронавирус жұқтырған алғашқы адам 13 наурызда анықалған. Ол осы бизнес-джетпен Германиядан Нұр-Сұлтанға ұшып келген еді.
Қазір жеке ұшақпен келген барлық адам карантинде.
25 наурыздағы дерек бойынша, Қазақстанда 79 адам коронавирус жұқтырған. Алматыда — 31 адам, Нұр-Сұлтанда — 41 адам, Қарағандыда — 2 адам, Алматы облысында — бір адам, Ақтөбе облысында — бір адам, Шымкентте — бір адам, Жамбыл облысында — бір адам, Солтүстік Қазақстан облысында бір адам емделіп жатыр.
