Қазақстан мен Қытай арасындағы тауар айналымы 2,5 есеге артады
Президент Қасым-Жомарт Тоқаев Қазақстан мен Қытай арасындағы тауар айналымы 100 миллиард долларға дейін жететінін айтты, деп хабарлайды Zhasalash.kz сайты.
Бұл туралы Президент Қазақстанға ресми сапармен келген Қытай Халық Республикасы Мемлекеттік кеңесі Премьерінің орынбасары Лю Гочжунмен кездесуде айтты.
Екіжақты сауда-саттықтың көлемі бойынша көш бастап тұрған Қытай – Қазақстанның жетекші сауда-экономикалық серіктесі. Өткен жылдың қорытындысы бойынша екі ел арасындағы тауар айналымы 40 миллиард долларға жетті. Бұл – рекордтық көрсеткіш. Біз мұны 100 миллиард долларға дейін жеткізуді көздеп отырмыз. Бұл мақсатқа қол жеткізуге болады, деді Тоқаев.
Сонымен қатар, кездесу барысында сауда, инвестиция, ауыл шаруашылығы, көлік-логистика, энергетика және туризм салаларындағы ықпалдастықты нығайту перспективалары, сондай-ақ мәдени-гуманитарлық байланыстарды дамыту мәселелері талқыланғаны айтылды.
Фото: Ақорда
