Қазақстан Орталық Азиядағы ең әртараптандырылған экономикалардың бірін қалыптастырды
Халықаралық бизнес үшін Қазақстан Орталық Азияға шығатын негізгі қақпа болып қала береді.
Халықаралық БАҚ жариялаған материалда айтылғандай, экономиканың ауқымы, макроэкономикалық тұрақтылық, дамыған қаржы инфрақұрылымы, салыстырмалы түрде мықты институттар және Еуропа мен Азияның тоғысындағы стратегиялық орналасуы Қазақстанды өңірдегі тікелей шетелдік инвестициялардың (ТШИ) ең көп көлемін жинақтаған елге айналдырды.
UNCTAD-тың World Investment Report 2025 баяндамасына сәйкес, Қазақстанда жинақталған тікелей шетелдік инвестиция көлемі 151,3 млрд долларды құрады. Бұл – Орталық Азиядағы жалпы 220,5 млрд долларлық көрсеткіштің 68,6%-ы.
Салыстыру үшін:
Түрікменстанда – 44,6 млрд доллар;
Өзбекстанда – 16,7 млрд доллар;
Қырғызстан мен Тәжікстанда – шамамен 4 млрд доллардан.
Қазақстандағы инвестициялардың осындай шоғырлануы ұзақ жылдар бойы қалыптасты. Инвесторларды ішкі нарықтың сыйымдылығы, табиғи ресурстар қоры, Еуропа мен Азия арасындағы қолайлы географиялық орналасуы, дамыған қаржы инфрақұрылымы және ірі халықаралық жобаларды жүзеге асыру тәжірибесі қызықтырады.
Қазақстанның инвестициялық саясаты реттеудің болжамдылығын одан әрі арттыруға және инвесторларға ұзақ мерзімді жобаларды іске асыруға қолайлы жағдай жасауға бағытталған. Президент Қасым-Жомарт Тоқаев тұрақты әрі түсінікті іскерлік ортаның маңызын бірнеше рет атап өткен.
Соған қарамастан, жинақталған инвестициялар көлемі халықаралық компаниялар үшін Қазақстанның Орталық Азиядағы ең ірі әрі ең дамыған инвестициялық алаң болып қала беретінін көрсетеді.
