Қостанайда «QOSTANAI TECH» отбасылық ғылыми-инновациялық фестивалі өтті

Ауқымды шара «Жастар сарайы» мен Индустриялық аймақ аумағында ұйымдастырылып, таңғы 9:00-ден кешкі 20:00-ге дейін жалғасып, 10 000-нан астам тұрғындар мен қала қонақтарын бір алаңға жинады.

Фестивальдің құрметті спикерлері қатарында Нобель бейбітшілік сыйлығының лауреаты, оңтүстіккореялық дипломат Рае Квон Чунг, белгілі ғалым, профессор Асқар Жұмаділдаев, «KIA QAZAQSTAN» компаниясының бас директоры Ким Де Ки, FreedomCloud компаниясының CEO-сы Темирлан Зиналабдин, сондай-ақ Габит Бекахметов болды. Олар инновация, технология және жасанды интеллекттің дамуы жөнінде өз ойларымен бөлісті.

Қатысушылар интерактивті көрмелерді, робототехника, VR/AI аймақтарымен танысып, ғылыми шоулар мен шеберлік сабақтарын тамашалады. Сонымен қатар, фестиваль сахнасында танымал блогерлер мен өнер жұлдыздары өнер көрсетіп, шараның көркін қыздырды.

«QOSTANAI TECH» фестивалі ғылым мен технологияны дәріптеп, жастар мен қоғамға жаңа мүмкіндіктер мен тың идеялар сыйлаған маңызды оқиға ретінде есте қалды.