Оңтүстік Корея Украинадағы елшілік қызметкерлерінің бір бөлігін кері шақыртады
Оңтүстік Корея Украинамен арадағы дипломатиялық дауға байланысты Киевтегі елшілігінің бірқатар қызметкерін кері шақырту туралы шешім қабылдады.
Екі ел арасындағы келіспеушілік Солтүстік Кореяның тұтқынға түскен екі әскери қызметкерін Сеулге беру мәселесінен туындаған.
20 қазанда Оңтүстік Корея Сыртқы істер министрлігі Украинадағы дипломатиялық өкілдігінің қызметкерлерін қысқартатынын мәлімдеді.
Дипломатиялық дау 23 қыркүйекте Украина президенті Владимир Зеленскийдің БҰҰ мінберінде Солтүстік Кореяның екі әскери тұтқыны Оңтүстік Кореяға берілгенін жариялауынан кейін басталған.
Сеул Киевті құпия ақпаратты жарияламау туралы келісімді бұзды деп айыптады. Ал Украина мұндай келісім болмағанын мәлімдеді.
Қазан айының басында Оңтүстік Корея наразылық ретінде Украинадағы елшісін кері шақыртып алған еді. Енді елшіліктің тағы бірнеше қызметкері елге қайтарылады.
Оңтүстік Корея СІМ өкілі Пак Ду Сунның айтуынша, мұндай шешімге Украина тарапының дауды реттеу үшін нақты қадам жасамауы және Ресейдің шабуылдары салдарынан дипломаттардың қауіпсіздігіне төнген қатер себеп болған.
"Біздің мақсатымыз – Украина тарапымен тығыз консультациялар жүргізу арқылы мәселені бейбіт жолмен шешу. Біз өз ұстанымымыз бен талаптарымызды жеткіздік. Енді Украина тиісті жауап беруге немесе нақты шара қабылдауға тиіс", – деді ол.
Сеул Киевте уақытша сенімді өкіл мен дипломатиялық байланыстарды сақтауға қажетті қызметкерлерді қалдырады.
Сеул Зеленскийден кешірім күтеді
Оңтүстік Корея сыртқы істер министрі Чо Хён бұған дейін Украинадан кешірім мазмұнындағы хабарлама келгенін айтқан. Алайда оның сөзінше, бұл Сеул күткен деңгейдегі кешірім болмаған.
Ал Украина билігі мәселе шешілді деп есептейді.
Әскери тұтқындарға қатысты дау
Украина Оңтүстік Кореяға берген екі әскери қызметкер Ресей жағында соғысқан Солтүстік Корея әскерінің құрамында болған.
Олар 2025 жылдың басында украин әскерінің қолына түскен. Кейін БАҚ-қа берген сұхбаттарында Солтүстік Кореяға қайтарылған жағдайда қудалауға ұшыраудан қорқатындарын айтып, Оңтүстік Кореяда өмір сүргісі келетінін жеткізген.
Сеулдің мәлімдеуінше, тұтқындарды беру туралы ақпараттың құпия сақталуы олардың және Солтүстік Кореяда қалған туыстарының қауіпсіздігі үшін маңызды болған.
Әзірге Оңтүстік Корея елшіліктің нақты қанша қызметкерін және қашан кері шақыртатынын жариялаған жоқ.
