Қазақстанда тоғыз айда хабар-ошарсыз кеткен 17 мыңнан астам адам табылды
Қазақстанда 5 қазаннан бері "Қауіпсіз үй" жедел-профилактикалық іс-шарасы өтіп жатыр. Бұл туралы Polisia.kz хабарлады.
Іс-шара басталғалы полиция қызметкерлері шамамен 249 мың тұрғын үйді, соның ішінде 12,5 мың жалдамалы пәтерді аралап шықты. Нәтижесінде тіркеусіз тұрудың 9 мыңға жуық дерегі анықталып, 7 189 шетел азаматы әкімшілік жауапкершілікке тартылды. Тұрақты тұратын жері жоқ 2 128 адам полицияға жеткізілді.
Полицейлер тұрғындарға мүлікті қорғау және жеке қауіпсіздікті сақтау жөнінде 223 мыңнан астам жадынама таратып, халықпен 8 мыңнан астам кездесу өткізді. Жиындарға 160 мыңға жуық азамат қатысты. Арнайы QR-кодтар мен чаттар арқылы полицияға түскен 2 693 өтініш пен ұсыныстың әрқайсысы бойынша тиісті шаралар қабылданған. Профилактикалық есепте тұрған 6 мыңға жуық адам тексеріліп, 1 511 құқық бұзушылықтың жолы кесілді.
Кәмелетке толмағандар арасындағы құқық бұзушылықтардың алдын алу кезінде түнде заңды өкілдерінсіз жүрген жасөспірімдерге қатысты 3 883 дерек тіркелді. Олардың 396-сы бейімдеу орталықтарына орналастырылды. Алматыда кафеде заң талаптарын бұза отырып жүрген жасөспірім анықталып, мекеме иесіне қатысты әкімшілік іс қозғалды. Кафенің жұмысы 10 тәулікке тоқтатылды.
Сонымен қатар полиция іздестіру жұмыстарын жалғастырып жатыр. 2026 жылдың алғашқы тоғыз айында хабар-ошарсыз кеткен 17 мыңнан астам адамның жүрген жері анықталды. Қазақстанның құқық қорғау органдары іздеген 1 031 күдікті ұсталды.
Бұдан бөлек, Қазақстан аумағында ТМД елдері мен басқа мемлекеттердің құқық қорғау органдары іздестірген 537 адам қолға түсті. Олардың арасында 1,3 млрд теңгеден астам сомаға алаяқтық жасады деген күдікпен Алматыда ұсталған 45 жастағы шетел азаматы да бар.
"Қауіпсіз үй" жедел-профилактикалық іс-шарасы 5 қарашаға дейін жалғасады.
