«Саламатты Қазақстан» пойызы өз жұмысын батыс өңірлерден бастайды

Биылғы жылы «Дөңгелектегі емхана» өз жұмысын су тасқынынан зардап шеккен батыс өңірлерден бастайды және 90 мың ауыл тұрғындарын медициналық қызметтермен қамтуға бағытталған.

«Жобаның арқасында станциялардың және оған іргелес елді мекендердің көптеген тұрғындары білікті дәрігерлерден консультация алып, қандай да бір ауруларға тексеріле алады. Биыл алғаш рет маммограф сатып алынды, оның қызметтері де халыққа қолжетімді болады. Пойыз жұмысына 14 арнайы маман қатысады. Осылайша, пойыз қызметінің арқасында адамға тиімді көмек көрсетуге болатын патологияны ерте кезеңде анықтау мүмкіндігі артып келеді», - деді Денсаулық сақтау бірінші вице-министрі Тимур Сұлтанғазиев.

Дәрігерлік бригаданың құрамында терапевт, хирург, педиатр, психолог, невропатолог, ультрадыбыстық диагностика маманы, жалпы практика дәрігері, рентгенолог, кардиолог, стоматолог, офтальмолог, отоларинголог, онколог-маммолог, гинеколог және уролог медициналық көмек көрсетеді.

Консультациялық-диагностикалық көмектен басқа, медициналық пойыз мамандары шағын операциялар жүргізе алады, стационарларға жоспарлы емделуге жолдама бере алады.

Фото: ҚР Денсаулық сақтау министрлігі