Семейде сот алдында өзін өртеген ер адам көз жұмды: ол 19,9 млн теңге өтемақы талап еткен
Семейде Абай облыстық сотының ғимараты алдында өзін өртеген ер адам оқиға орнында қайтыс болды.
Марқұм бұған дейін лизинг компаниясынан 19,9 миллион теңге өтемақы өндіруді талап еткен.
Оқиға 30 қазанда болған. Алдын ала мәлімет бойынша, ер адам облыстық сот ғимаратының алдына келіп, өзіне от қойған. Алған жарақаттарының салдарынан ол оқиға орнында көз жұмған.
Абай облыстық полиция департаменті аталған дерек бойынша қылмыстық іс қозғалғанын хабарлады. Қазіргі уақытта оқиғаның барлық мән-жайы анықталып жатыр.
19,9 миллион теңгелік дау неден басталды?
Абай облыстық сотының мәліметінше, марқұм Қазақстанда тұрған шетел азаматы болған. Ол бұған дейін өзге шетел азаматына қатысты қылмыстық іс бойынша жәбірленуші ретінде танылған.
Іс материалдарына сәйкес, 2020 жылы оның кәсіпорны лизинг компаниясы арқылы бес жүк көлігін сатып алған. Алайда кәсіпорын келісімшартта көрсетілген соманы толық төлемеген.
Кейін, 2024 жылы лизинг компаниясының өкілі сот шешімінсіз төрт жүк көлігін және олардың қосалқы бөлшектерін алып кеткен.
Сот бұл әрекетті Қазақстан Республикасы Қылмыстық кодексінің 389-бабы бойынша өз бетінше билік ету деп таныған. Алайда кінәлі деп танылған адам қылмыстық жауаптылыққа тартудың ескіру мерзімі өтуіне байланысты жазадан босатылған.
Сот неге өтемақы өндіру туралы талапты қанағаттандырмады?
Марқұм лизинг компаниясының әрекетінен материалдық шығынға ұшырағанын айтып, 19,9 миллион теңге өтемақы талап еткен.
Бұл сома жоғалған қосалқы бөлшектер мен жабдықтардың құнын, сондай-ақ бесінші жүк көлігін жөндеуге жұмсалған шығындарды қамтыған.
Алайда сот ұсынылған дәлелдемелер жеткіліксіз деген негізбен азаматтық талапты қараусыз қалдырған. Сонымен қатар жәбірленушіге өтемақы өндіру үшін азаматтық сот ісін жүргізу тәртібімен қайта жүгіну құқығы түсіндірілген.
Осылайша, сот лизинг компаниясы өкілінің әрекетін заңсыз деп танығанымен, жәбірленушінің материалдық шығынды өндіріп алу мәселесі шешілмеген.
Полиция тергеу жүргізіп жатыр
Қазіргі уақытта ер адамның өзіне қол жұмсауына нақты не себеп болғаны белгісіз. Оның өлімі мен сот шешімінің арасындағы ықтимал байланыс жөнінде ресми қорытынды жарияланған жоқ.
Полиция оқиғаның мән-жайын анықтап жатыр.
