Шығыс Қазақстан облысында тас жолдың бір бөлігі опырылып, көлік қозғалысы тоқтатылды

Апат орын алған аумақ Степное ауылы мен Алтай қаласының арасындағы жол учаскесіне тиесілі. Жол қозғалысы 15 сәуір күні кешкі сағат 20:50-де шектелді. Жергілікті билік өкілдерінің хабарлауынша, қауіпті учаскеде арнайы апаттық-құтқару қызметтері мен жол-коммуналдық мекемелердің мамандары дереу жұмылдырылып, тиісті шаралар қабылдануда.

«Қазіргі таңда жолдың опырылған бөлігінде қауіпсіздік шаралары күшейтілді. Жолдың кіреберісіне бақылау посттары қойылды. Құтқарушылар мен техника тәулік бойы жұмыс істеп жатыр», – деп хабарлады облыстық төтенше жағдайлар департаменті.

Жол төсемін қалпына келтіру жұмыстарына «КАЖсервис» серіктестігінің күшімен 22 арнайы техника бірлігі тартылған. Қалпына келтіру барысында жолға тас жынысты топырақ төселіп, нығайту жұмыстары жүргізілуде. Бұл – уақытша шешім. Жолдың толық қалпына келтірілуі ауа райына және геологиялық жағдайларға байланысты бірнеше күнге созылуы мүмкін.

Айта кету керек, бұл бағыт – өңір тұрғындары мен туристер үшін маңызды жол. Әсіресе көктем мен жаз мезгілдерінде Рахман қайнарына баратын туристік ағын күрт артады. Сол себепті жолдың қауіпсіздігі мен қолжетімділігі – жергілікті билік үшін басты назарда.

Мамандар жағдайды бақылауда ұстап отыр. Қауіп сейіліп, жол қайта ашылғаны жөнінде қосымша хабарланатын болады. Жолаушыларға балама бағыттарды пайдалану және ресми ақпарат көздерінен хабар алып отыру ұсынылады.