ШҚО-да жол құрылысына бөлінген 120 млн теңгеге бірнеше көлік пен элиталы пәтер сатып алынған

Тергеу нұсқасы бойынша, ұрланған сома 120 миллион теңгеден асады.

Тергеу деректері

Қаржылық мониторинг агенттігінің хабарлауынша, күдіктілер үшеу:

• ұйымның бұрынғы директоры,

• оның орынбасары,

• және бір жеке кәсіпкер.

Бұрынғы директор екі айға қамауға алынған, ал қалған күдіктілерге қатысты бұлтартпау шарасы жайлы агенттік нақтылама бермеді.

Тергеу мәліметінше, 2022-2023 жылдары «Таза Өскемен» басшылығы қала жолдарын күтіп ұстауға бөлінген бюджеттік ақшаны мемлекеттік сатып алу рәсімінсіз өздерімен байланысы бар коммерциялық ұйымдарға аударып отырған.

Схеманың мәні – жалған құжаттар жасау болған. Іс жүзінде орындалмаған жұмыстар мен жеткізілмеген материалдарға актілер рәсімделген.

Құжаттарда битум мен құм сатып алу, суды айдайтын арнайы техника жалға алу, сондай-ақ әлдеқашан орнатылған 23 аялдама павильонына материал алу туралы жалған деректер көрсетілген.

Осылайша ақшалар жеке кәсіпкер арқылы қолма-қол ақшаға айналдырылып, қатысушылар арасында бөлінген.

Ақша қайда кеткен

Тергеу нұсқасына сай, ұрланған 120 млн теңгеден астам қаржыға:

• Өскемен қаласындағы элиталы тұрғын үй кешенінен пәтер,

• BMW X6M және Subaru Forester автокөліктері,

• сондай-ақ жер учаскелері сатып алынған.

Қаржылық мониторинг агенттігі істің тергеліп жатқанын растады. Күдіктілерге қарсы «Сеніп тапсырылған мүлікті иелену немесе ысырап ету» бабы бойынша іс қозғалған.