TikTok-қа балалардың жеке деректерін қорғау талаптарын бұзғаны үшін 400 млн доллар айыппұл салынды
Қытайлық ByteDance компаниясы мен оның TikTok платформасы АҚШ-та балалардың жеке деректерін қорғау талаптарын бұзу туралы істі реттеу үшін 400 млн доллар төлеуге келісті.
Келісім бойынша компания 300 млн долларды бірден төлейді. Қалған 100 млн доллар бұрынғы Musical.ly платформасына қатысты сот келісімі күшін жойғаннан кейін аударылады. Бұл іске АҚШ Әділет министрлігі мен Федералдық сауда комиссиясы 2024 жылы бастамашы болған.
Америкалық билік TikTok пен ByteDance-ті 13 жасқа толмаған балалардың жеке ақпаратын ата-аналарының келісімінсіз жинады және сақтады деп айыптаған. Тергеу нұсқасына сәйкес, платформа кәмелетке толмаған пайдаланушылардың жас шектеулерін айналып өтуіне мүмкіндік берген. Сонымен қатар ата-аналар балаларының аккаунттарын өшіруді сұраған жағдайда, кейбір есептік жазбалар дер кезінде жойылмаған.
Келісім TikTok-тың АҚШ-тағы балалардың онлайн қауіпсіздігіне қатысты заңды дауды реттеуіне мүмкіндік береді. Компания бұл келісім аясында істі ұзақ сот талқылауына жеткізбей аяқтауға келісті.
