Трамп Иранның бейбітшілік туралы ұсынысын кері қайтарды

Иранның ұсыныстары жарияланғаннан кейін бірнеше сағат өткен соң, Трамп әлеуметтік желідегі парақшасында бұл шарттарға үзілді-кесілді қарсы екенін білдірді.

«Маған бұл ұнамайды — МҮЛДЕМ ҚАБЫЛДАНБАЙДЫ», - деп жазды Трамп ешқандай егжей-тегжейлі түсініктеме берместен.

Айта кетейік, АҚШ тарапы Иранның ядролық бағдарламасы бойынша келіссөздерді бастамас бұрын, алдымен әскери қимылдарды тоқтатуды ұсынған болатын. Жексенбі күні Иранға қарсы әскери операциялардың аяқталуы туралы сұраққа Трамп: «Олар жеңілді, бірақ бұл олардың шаруасы бітті дегенді білдірмейді», - деп жауап берді.

Иран қандай шарттар қойды?

Reuters агенттігінің хабарлауынша, Тегеранның жауап хатында соғысты барлық фронттарда, соның ішінде Ливандағы Израиль мен «Хезболла» арасындағы қақтығыстарды тоқтату көзделген. Сонымен қатар, Иран мынадай талаптар қойған:

• Соғыс шығындары үшін өтемақы төлеу;

• Ормуз бұғазына Иранның егемендігін мойындау;

• Теңіз блокадасын тоқтату және алдағы уақытта шабуыл жасамауға кепілдік беру;

• Санкцияларды жою және Иран мұнайын сатуға қойылған тыйымды алып тастау.

Әскери шиеленіс және «дрон шабуылдары»

Дипломатиялық талпыныстарға қарамастан, Ормуз бұғазы маңында қақтығыстар жиілеп кетті. Біріккен Араб Әмірліктері Ираннан келген екі дронды атып түсіргенін хабарласа, Катар өз су айдынында жүк кемесіне жасалған шабуылды айыптады. Кувейт те өз әуе кеңістігіне кірген дрондарға қарсы әуе қорғаныс жүйелерін іске қосты.

Израиль премьер-министрі Биньямин Нетаньяху Иранмен әскери іс-қимылдардың тоқтауы Ливандағы соғыстың аяқталғанын білдірмейтінін қадап айтты. Оның сөзінше, Иранның ядролық нысандарын жою және баллистикалық зымыран мүмкіндіктерін шектеу бойынша әлі де «атқарылатын істер көп».

Мұнай нарығындағы дүрбелең

Ормуз бұғазының жабық қалуы туралы хабарлардан соң, дүйсенбі күні мұнай бағасы бір баррель үшін 4 доллардан астамға қымбаттады. Соғыс басталғанға дейін әлемдік мұнай мен сұйытылған табиғи газ ағынының бестен бір бөлігі дәл осы су жолы арқылы тасымалданатын.

Сарапшылардың пікірінше, мұнай нарығы қазір Вашингтон мен Тегераннан шыққан әрбір мәлімдемеге селт ететін «геосаяси жаңалықтар машинасына» айналған.

Дипломатиялық сапар: Трамп Қытайға барады

Дональд Трамп алдағы сәрсенбі күні Бейжіңге баруды жоспарлап отыр. Си Цзиньпинмен кездесуде Иран мәселесі басты тақырыптардың бірі болмақ. АҚШ Президенті Тегеранды келісімге көндіру үшін Қытайдың ықпалын пайдалануға тырысады.

Осы тұста Иран Президенті Масуд Пезешкиан әлеуметтік желіде: «Тегеран ешқашан жау алдында бас имейді және ұлттық мүддені табандылықпен қорғайды», - деп мәлімдеді.