Трамп Қытайды 2020 жылғы АҚШ сайлауына араласты деп айыптады
АҚШ президенті Дональд Трамп халыққа жасаған 25 минуттық үндеуінде елдің сайлау жүйесінде «алаңдатарлық осал тұстар» бар екенін мәлімдеп, 2020 жылғы президенттік сайлауға Қытайдың ықпалы туралы барлау материалдарының құпиясыздандырылғанын хабарлады.
Трамптың айтуынша, жарияланған мәліметтерге сәйкес, Қытай 220 миллион америкалық сайлаушының деректеріне қол жеткізген. Оның сөзінше, бұл ақпараттың қатарында сайлаушылардың аты-жөні, мекенжайы, телефон нөмірлері, партиялық тиесілігі және өзге де жеке деректері бар. Президент бұл мәліметтер сатып алынған, ұрланған немесе кибершабуыл арқылы қолға түскен болуы мүмкін екенін айтты.
Сонымен қатар Трамп АҚШ-тың төрт штатында шамамен 278 мың АҚШ азаматы емес адамның сайлаушы ретінде тіркелгенін мәлімдеді.
«Қытай дауыстарды ауыстырып, журналистерге ақша төлеген»
АҚШ президентінің айтуынша, Қытай қолына түскен деректерді 2020 жылғы президенттік сайлауға ықпал ету үшін пайдаланған. Трамптың сөзінше, Бейжің оның сайлауда жеңілуіне мүдделі болған және бұл үшін нақты берілген дауыстарды ауыстыруға, сондай-ақ өзі туралы жағымсыз материалдар жариялаған америкалық журналистерге ірі көлемде ақша төлеуге барған.
Ол мұны өзінің Қытайға қарсы миллиардтаған долларлық кедендік тарифтер енгізуді жоспарлауымен және АҚШ-тың әскери қуатын күшейту ниетімен байланыстырды.
Трамптың пікірінше, АҚШ сайлау жүйесіндегі осалдықтарды тек Қытай ғана емес, Ресей, Иран, Солтүстік Корея және кейбір мемлекеттік емес топтар да пайдалана алады.
«Ақпаратты мемлекет жасырды»
Президент бұл мәліметтердің осы уақытқа дейін жарияланбауына америкалық арнайы қызметтердегі «мемлекет» өкілдерін кінәлады.
Оның айтуынша, олар Қытайдың сайлауға ықтимал араласуы туралы ақпаратты әдейі жасырып, оның ауқымын төмендетіп көрсеткен.
Осыған байланысты Трамп Ұлттық барлау директоры басқармасына, АҚШ Әділет министрлігіне бұл ақпараттың қалай және не себепті жасырылғанын тергеуді, оған қатысы бар тұлғаларды қызметтен босатуды және заң бұзушылық анықталған жағдайда қылмыстық іс қозғауды тапсырды.
