Трамп Украинадағы соғысқа Зеленский мен Путинді де айыптады

 Ақ үйде Сальвадор президенті Наиб Букелемен өткен кездесуде Трамп журналистер сұрағына жауап беріп, бұл соғыстың басталуына жол берілгені үлкен қателік екенін атап өтті.

Трамп «Путин – бірінші кінәлі, ал Джо Байден – екінші, себебі ол жағдайды түсінбейді және дұрыс әрекет етпеді. Зеленский де осы қатарда кінәлі», – деп мәлімдеді. Ол миллиондаған адамның үш адамның әрекетінен қаза болғанын айтты. Бұл мәлімдеме сарапшылар арасында сын тудырды, өйткені құрбандардың саны миллиондаған емес, он мыңдаған немесе жүз мыңдаған болуы мүмкін.

Сонымен қатар, Трамп Украинаға Patriot әуе қорғаныс жүйесін беру мәселесі бойынша өз ұстанымын білдірді. Оның айтуынша, Украина өзінен бірнеше есе үлкен қарсыласқа соғыс ашып, кейін қолдау күтпеуі керек еді.

Зеленский болса, Трамптың бұл мәлімдемесіне қарсы пікірін білдірді. Украина президенті елінің соғысты бастамағанын және бейбітшілікке дайын екенін бірнеше рет мәлімдеді. Зеленскийдің айтуынша, Украина 2014 жылдан бері агрессияға ұшырап келеді және әлем Ресейдің агрессиясын тоқтатуға күш салуы тиіс.

Өткен аптада Трамптың арнайы өкілі Стивен Уиткофф Путинмен Санкт-Петербургте келіссөз жүргізген. Уиткофф келіссөз барысында Ресейдің нақты талаптарын анықтағанын айтты. Ресей тарапынан НАТО-ға мүше болмау және кейбір аумақтардан бас тарту талаптары қойылған.

АҚШ әкімшілігінде бұл мәселеге қатысты пікірлер әртүрлі. Бірқатар шенеуніктер Трампқа Ресеймен қарым-қатынаста қатаң позиция ұстануды ұсынса, Трамп әзірге Путинмен келіссөз жүргізуге бейім екенін көрсетіп отыр.