Жаңа өндірістер өңдеу өнеркәсібінің өсіміне серпін берді
Қазақстанда өңдеу өнеркәсібі тұрақты өсім көрсетіп, өндіріс көлемі биылғы жылдың алғашқы жартысында шамамен 9 пайызға артты.
Бұл нәтижеге жаңа өндірістік кәсіпорындарды іске қосу, инвестициялық жобаларды жүзеге асыру және өнеркәсіпті жаңғырту бағытында қабылданған жүйелі шаралар ықпал етті.
Саладағы оң динамика ең алдымен жаңа өндіріс қуаттарының пайдалануға берілуімен байланысты. Өткен жылы елімізде жүзден астам жаңа өндірістік жоба іске қосылып, кәсіпорындардың өндірістік әлеуеті кеңейді әрі жаңа жұмыс орындары ашылды. Биыл да инвестициялық жобаларды кезең-кезеңімен жүзеге асыру жалғасып, ондаған жаңа өндіріс өз жұмысын бастады.
Өңдеу өнеркәсібінің дамуы экономиканы әртараптандырудағы негізгі бағыттардың бірі болып қала береді. Мемлекет қосылған құны жоғары өнім шығаратын кәсіпорындарды қолдауға, жаңа технологияларды енгізуге және өндірістік кооперацияны дамытуға басымдық беріп отыр. Осы мақсатта машина жасау саласын дамытуға арналған заңнамалық өзгерістер қабылданып, өнеркәсіптік кластерлерді қалыптастыру, шағын және орта бизнестің өндірістік тізбекке қатысуын кеңейту сияқты жаңа тетіктер енгізілуде.
«Өңдеу өнеркәсібіндегі 9 пайыздық өсім жаңа өндірістік қуаттардың іске қосылуының нәтижесінде қамтамасыз етілді. Биыл жалпы құны 1,7 триллион теңгені құрайтын 200 инвестициялық жобаны жүзеге асыру жоспарланып отыр», – деді Өнеркәсіп және құрылыс министрі Ерсайын Нағаспаев.
Сонымен қатар арнайы экономикалық аймақтардың жұмысын жетілдіру де назардан тыс қалған жоқ. Инвесторларға қолайлы жағдай жасау үшін «бір терезе» қағидатын енгізу, дайын өндірістік алаңдар құру және инфрақұрылымды жақсарту бойынша жұмыстар жүргізілуде. Мұндай қадамдар жаңа өндірістерді іске қосу мерзімін қысқартып, инвестициялық тартымдылықты арттыруға мүмкіндік береді.
Мамандардың пікірінше, өңдеу өнеркәсібінің тұрақты дамуы ел экономикасының бәсекеге қабілеттілігін күшейтіп, импортқа тәуелділікті азайтуға және экспорттық әлеуетті ұлғайтуға ықпал етеді. Сондықтан жаңа өндірістерді іске қосу мен индустриялық-инновациялық жобаларды қолдау алдағы жылдары да Қазақстанның өнеркәсіптік саясатының негізгі басымдықтарының бірі болып қала береді.
