Жетісу облысында гидроцикл жүргізу қағидаларын бұзғандар жауапқа тартылды
Азаматтардың қауіпсіздігін қамтамасыз ету және халық көп шоғырланатын демалыс орындарында қоғамдық тәртіпті сақтау мақсатында Жетісу облысы полиция департаментінің қызметкерлері төтенше жағдайлар департаментінің қызметкерлерімен бірлесіп өңірдің су айдындарында профилактикалық рейдтік іс-шараларды жалғастырып жатыр.
Кезекті рейд барысында полиция қызметкерлері 23 жастағы азаматты анықтап, оны заңнамаға сәйкес шара қабылдау үшін төтенше жағдайлар департаментінің қызметкерлеріне тапсырды. Кейін жүргізілген тексеру нәтижесінде шағын көлемді кемелерді пайдалану қағидаларын өрескел бұзудың үш фактісі анықталды. Атап айтқанда, гидроциклді басқару құқығы жоқ адамға басқаруды беру, тиісті куәліксіз гидроциклді басқару, сондай-ақ құтқару кеудешесінсіз су көлігін пайдалану деректері бойынша құқық бұзушылар әкімшілік жауапкершілікке тартылды.
Мұндай құқық бұзушылықтар демалушылардың өмірі мен денсаулығына нақты қауіп төндіреді және адамдар көп жиналатын орындарда мүлде жол берілмейді. Полиция мен ТЖД-ның бірлескен жұмысы құқық бұзушылықтарды анықтаумен қатар, қайғылы оқиғалардың алдын алуға бағытталған.
Полиция профилактикалық рейдтер жалғасатынын еске салады. Қоғамдық тәртіп пен қауіпсіздік талаптарын бұзудың кез келген фактісі дереу тоқтатылып, кінәлі тұлғалар Қазақстан Республикасының қолданыстағы заңнамасына сәйкес жауапкершілікке тартылады.
