Түркістанда жоғалған 4 жасар баланың денесі табылды
Түркістанда екі күн қатарынан іздестірілген 4 жасар баланың өлі денесі табылды, деп хабарлайды Zhasalash.kz Polisia.kz-ке сілтеме жасап.
3 желтоқсан күні түстен кейін үздіксіз іздестіру нәтижесінде 4 жасар баланың денесі көрші үйдің жанындағы септиктен табылды. Баланың денесін медициналық сарапшылар тексерді, зорлық-зомбылықпен өлім белгілері табылған жоқ.
Қазіргі уақытта оқиға орнында жедел-тергеу тобының қызметкерлері, полиция департаменті мен прокуратура басшылығы жүр. Болған оқиғаның барлық жағдайлары анықталады.
1 желтоқсан күні кешке жергілікті тұрғын қала полициясына хабарласып, ойнауға шыққан 4 жасар ұлы үйіне оралмағанын жеткізген еді.
Жоғалған баланы іздеуге полиция департаментінің барлық күштері мен құралдары, сондай-ақ Ұлттық ұланның құтқарушылары мен әскери қызметшілері жұмылдырылды. Баланы іздеуде еріктілер, жергілікті тұрғындар және бей-жай қарамайтын азаматтар да көмек көрсетті.
Жақын маңдағы аумақтарды, тұрғын үйлерді аралау жүргізілді, қараусыз қалған үйлер, арықтар және кішкентай бала бара алатын басқа да орындар тексерілді.
