Алматыда ойын алаңында балаға күш көрсеткен ер адам қамауға алынды
Алматы қаласында тұрғын үй кешендерінің бірінің аумағында кәмелетке толмаған балаға күш көрсеткен ер адам ұсталып, қамауға алынды.
Оқиға балалар ойын алаңында болған. Бейнебақылау камераларына түсіп қалған кадрларда ер адамның балаларға жақындап, олардың бірін итеріп жібергені көрінеді. Салдарынан бала дене жарақатын алған.
Полицияның мәліметінше, күдікті осы тұрғын үй кешенінің тұрғыны болып шыққан. Алдын ала болжам бойынша, оқиғаға балалар арасындағы ойын кезінде туындаған жанжал себеп болған. Осыдан кейін ер адам жағдайды өз бетінше шешуге әрекет жасаған.
Аталған дерек бойынша денсаулыққа зиян келтіру фактісімен қылмыстық іс қозғалды. Күдікті ұсталып, соттың санкциясымен қамауға алынды.
Қазіргі уақытта оқиғаның барлық мән-жайын анықтауға бағытталған тергеу амалдары жүргізіліп жатыр.
