Ослода Эпштейн ісіне қатысы бар норвегиялық дипломаттардың ұлы өзіне қол жұмсады
Эпштейнмен байланысы тексеріліп жатқан норвегиялық дипломаттардың ұлы Ослода суицид жасады.
Осло қаласында норвегиялық жоғары лауазымды екі дипломаттың ұлы Эдвард Юул Рёд-Ларсен өзіне қол жұмсады.
Мәліметке сәйкес, қайғылы оқиға оның ата-анасы — Мона Юул мен Терье Рёд-Ларсен — америкалық қаржыгер Джеффри Эпштейн ісі бойынша тексеріле бастағаннан кейін қоғамда пайда болған ақпараттар аясында болған. Айтылған деректерге қарағанда, олар ұлын 10 жасында Эпштейннің аралына апарған. Кейін Эпштейн оған 5 миллион доллар мұра қалдырған.
Дипломаттарға қатысты тергеу олардың қаржыгермен ықтимал байланыстары анықталғаннан кейін басталған. Отбасының адвокаттары таратқан мәлімдемеде Эдвардтың өзіне қол жұмсауына оның Эпштейнмен қаржылық байланыстары да әсер еткен болуы мүмкін екені айтылған.
«Қоғам назарында тек ата-анасы ғана емес, олардың балалары да еріксіз түрде қоғамдық бақылаудың қатал қысымына түсті», — делінген адвокаттардың мәлімдемесінде.
Эпштейн ісіне қатысты құжаттар былтыр 20 желтоқсанда жариялана бастаған. Бұған дейін, 19 қарашада АҚШ президенті оларды жариялау туралы заңға қол қойған.
14 ақпанда АҚШ-тың бұрынғы бас прокуроры Пэм Бонди 300-ден астам танымал адамның аты аталған тізімді жариялады. Онда АҚШ-тың 42-президенті Билл Клинтон, 46-президенті Джо Байден, Билл Гейтс және әнші Бейонсе есімдері көрсетілген.
6 наурызда Sky News АҚШ Әділет министрлігі Эпштейн ісіне қатысты қосымша құжаттарды жариялағанын хабарлады. Бұған дейін батыс БАҚ бұл ведомство Эпштейн құрбандарымен жүргізілген ондаған FBI сұхбаттарын жасырды деп мәлімдеген еді. Кейін құжаттар қайтадан қолжетімді болған.
