Ресей Германиядан Жеңіс символдарына салынған тыйымды алып тастауды талап етті
Германиядағы Ресей елшілігі Берлиндегі кеңес жауынгерлеріне арналған мемориалдар маңында Жеңіс күніне қатысты символды көрсетуге салынған тыйымға пікір білдірді.
Бұған дейін 2026 жылғы 8 және 9 мамырда Берлиндегі Трептов-парк, Тиргартен және Панков аудандарындағы кеңестік мемориалдар маңында Ресей мен Беларусь тулары мен Ұлы Отан соғысындағы Жеңіске қатысты бірқатар символдарды көрсетуге тыйым салынғаны белгілі болған.
Шектеуге:
▪️ Жеңістің Қызыл туы;
▪️ КСРО туы мен елтаңбасы;
▪️ Георгий ленталары;
▪️ тарихи әскери форма;
▪️ кеңестік әскери әндер мен марштар енгізілген.
Ресей елшілігі Берлин бұл тыйымдарды Украинадағы жалғасып жатқан соғысқа байланысты енгізіп отырғанын, алайда мұндай шараларды «абсурд әрі циникалық» деп санайтынын мәлімдеді.
Дипломатиялық миссияның пікірінше, бұл шектеулер кеңес жауынгерлерінің ұрпақтары мен Берлин тұрғындары және қонақтарының Ұлы Отан соғысында қаза тапқандарды еске алу құқығын шектеуге бағытталған.
«Берлин енгізген шектеулерді негізсіз, кемсітушілік сипаттағы және достыққа жат қадам деп есептейміз. Мұны қаза тапқандардың рухына деген құрметсіздік деп көреміз», – делінген елшілік мәлімдемесінде.
Сондай-ақ дипломатиялық өкілдік ешқандай тыйым көпұлтты кеңес халқының нацистік Германияны жеңудегі үлесін жоққа шығара алмайтынын атап өтті.
Мәлімдемеде Кеңес Одағы Жеңіс үшін 27 миллион адамның өмірін құрбан еткені айтылған. Олардың қатарында майданда, концлагерьлерде, мәжбүрлі еңбек кезінде, аштықтан, аурудан, бомбалау мен жазалау операцияларынан қаза тапқандар бар.
Ресей елшілігі 8 және 9 мамыр күндері барлық адам қаза тапқан қызыл әскер сарбаздары мен нацизм құрбандарын дәстүрлі түрде еркін еске алу мүмкіндігіне ие болуы керек деп санайды.
Осыған байланысты елшілік Германия билігінен нацизмді жеңу символдарына қойылған тыйымды алып тастауды талап етті.
Сонымен қатар Ресей тарапы Германияны Екінші дүниежүзілік соғыс жылдарындағы Үшінші рейх пен оның одақтастары жасаған қылмыстарды Кеңес Одағы халықтарына қарсы жасалған геноцид ретінде ресми мойындауға шақырды.
