Оралда колония бастығының бұрынғы орынбасары пара алғаны үшін сотталды
Оралда түзеу мекемесі бастығының бұрынғы орынбасары Қайсар Құрманов сотталушыдан пара алғаны үшін 2,5 миллион теңге көлемінде айыппұл арқалады.
Сот мәліметінше, әділет майоры мамыр айының соңында өз үйінің маңында ақша алып жатқан сәтте ұсталған. Жеке тінту барысында оның қалтасынан 100 мың теңге табылған. Сол күні ҰҚК департаментінің қызметкерлері түзеу мекемесінде тінту жүргізгенімен, оның нәтижелері ресми түрде жарияланған жоқ.
Тергеу нұсқасына сәйкес, күдікті сотталушыға заңсыз артықшылықтар көрсету үшін ақша алған. Бейресми мәліметтерде бұл ұялы телефон өткізуге қатысты болуы мүмкін екені айтылып отыр. Ұсталғаннан кейін Құрманов кінәсін толық мойындап, тергеумен ынтымақтастық танытқан. Осыған байланысты іс жеңілдетілген тәртіппен қаралды.
Үкім Қылмыстық-атқару жүйесі департаменті қызметкерлерінің қатысуымен жария етілді. Сот бұрынғы қызметкерді пара алғаны үшін кінәлі деп танып, оған 2,5 миллион теңге айыппұл салды. Сондай-ақ ол әділет майоры арнайы атағынан, өмір бойына мемлекеттік қызметте жұмыс істеу құқығынан айрылды.
