АҚШ Ирандағы нысандарға қайтадан жаппай соққы жасады
АҚШ әскері Иран аумағындағы бірқатар нысанға қайтадан жаппай әуе соққыларын жасады.
Бұл туралы 30 шілдеде АҚШ Қарулы күштерінің Орталық қолбасшылығы (CENTCOM) хабарлады.
CENTCOM мәліметінше, бұл шабуыл Таяу Шығыста орналасқан америкалық әскерилерге бір күн бұрын жасалған зымыран шабуылына жауап ретінде ұйымдастырылған.
АҚШ әскері соққы барысында Иран Ислам революциясы сақшылар корпусының (ИРСК) ондаған нысанын, соның ішінде әскери басқару орталықтарын, зымыран қаруына, ұшқышсыз ұшу аппараттарына және жағалау күзетіне қатысты объектілерді нысанаға алғанын мәлімдеді.
CENTCOM-ның айтуынша, операцияның мақсаты – Иран мен оның одақтастарының америкалық әскерилерге, халықаралық коммерциялық кеме қатынасына және Парсы шығанағындағы көршілес мемлекеттерге төндіретін қаупін одан әрі азайту.
Ведомство 28 шілдеде ИРСК Иран аумағынан Таяу Шығыстағы америкалық әскери күштерге қарай бірнеше баллистикалық зымыран ұшырғанын, олардың барлығы әуе қорғаныс жүйелері арқылы атып түсірілгенін хабарлады.
Қазіргі уақытта Таяу Шығыста 50 мыңнан астам америкалық әскери қызметкер орналасқан.
АҚШ пен Иран арасындағы қақтығыс қайта күшейді
12-24 шілде аралығында АҚШ Ирандағы әскери нысандарға түнгі әуе соққыларын тұрақты түрде жасап келген. Вашингтон ол операциялардың мақсаты Ормуз бұғазындағы халықаралық кеме қатынасына қауіп төндіріп отырған ИРСК-ның әскери мүмкіндігін әлсірету екенін мәлімдеген.
Өз кезегінде Иран көрші елдер аумағындағы нысандарға соққы жасап, олардың мақсаты АҚШ әскери базалары екенін айтқан.
24 шілдеден кейін екі тарап бірнеше күн бойы бір-біріне шабуыл жасаудан бас тартқан. The New York Times басылымының жазуынша, дәл сол күні АҚШ президенті Дональд Трамп жоғары лауазымды кеңесшілерімен кездесіп, Иранға жаңа ауқымды соққы жасауды уақытша кейінге қалдыру туралы шешім қабылдаған.
Басылым мұның себептері ретінде Patriot әуе қорғаныс жүйелеріне арналған зымыран қорының азаю қаупін, сондай-ақ әлемдік энергетикалық және экономикалық дағдарыс тәуекелін атады.
Ал 28 шілдедегі шабуылдарды АҚШ әскері Сауд Арабиясының қарулы күштерімен бірлесіп жүзеге асырған. CENTCOM мәліметінше, бұл операция соңғы 72 сағат ішінде жасалған 30-дан астам дрон шабуылына жауап болған.
