АҚШ Конгресі ФИФА президенті Инфантинодан Трамппен байланысына түсініктеме талап етті
АҚШ Конгресінің Өкілдер палатасындағы ықпалды демократ депутат Джейми Раскин Халықаралық футбол федерациясы (ФИФА) мен оның президенті Джанни Инфантинодан АҚШ үкіметімен, әсіресе президент Дональд Трамппен болған байланыстары туралы ақпаратты 9 тамызға дейін ұсынуды талап етті.
Сонымен қатар, егер Инфантино осы уақытта АҚШ аумағында болса, ол Өкілдер палатасының Сот комитетіне келіп, түсініктеме беруі тиіс. Бұл туралы 28 шілдеде dpa агенттігі хабарлады.
63 жастағы Джейми Раскин қазіргі таңда Өкілдер палатасының Сот комитетіндегі ең жоғары лауазымды демократ саналады. Егер қарашадағы парламенттік сайлауда Демократиялық партия жеңіске жетсе, оның комитет төрағасы болу мүмкіндігі жоғары. The New York Times басылымының дереккөзі қазіргі сұрақтар кейін ФИФА-ға қатысты ресми тергеуге ұласуы мүмкін екенін айтқан.
«Трамп-тауэрдегі» кеңсе де күмән тудырды
dpa агенттігінің мәліметінше, Раскин өз хатында ФИФА Нью-Йорктегі Trump Tower ғимаратынан кеңсе жалдап отырғанын атап өткен. Оның нарықтық құны жылына шамамен 600 мың долларды құрайды.
Конгрессменнің пікірінше, бұл жағдай және бұған дейін Трампқа берілген «ФИФА-ның бейбітшілік сыйлығы» ұйым Ақ үй басшысы мен оның әкімшілігінің қолдауына ие болуға тырысып отырғандай әсер қалдырады.
Раскин ФИФА-дан Трампқа, оның әкімшілігіне және отбасы мүшелеріне берілген барлық сыйлықтар мен ақша аударымдарының тізімін ұсынуды талап етті. Сондай-ақ ол 2026 жылғы футболдан әлем чемпионатының билет бағасына қатысты АҚШ үкіметімен жүргізілген барлық хат-хабарды жариялауды сұрады. Бұған қоса, демократ саясаткер ФИФА-ның Майами мен Нью-Йорктегі кеңселеріне келген адамдардың тізімін де көргісі келеді.
Инфантиноға Трамппен жақындығы үшін сын айтылып жүр
Джанни Инфантино бұған дейін Дональд Трамппен шамадан тыс жақын қарым-қатынас орнатқаны үшін бірнеше рет сынға ұшыраған.
Атап айтқанда, 2025 жылдың желтоқсанында Трампқа Инфантиноның қатысуымен жаңадан тағайындалған ФИФА-ның «бейбітшілік сыйлығы» табысталған болатын. Бұл АҚШ президенті Нобельдің бейбітшілік сыйлығын алмағанына наразылық білдіргеннен кейін болған.
Сондай-ақ 2026 жылғы әлем чемпионаты кезінде АҚШ құрамасының шабуылшысы Фоларин Балогунның дисквалификациясының мерзімінен бұрын алынуы да дау туғызды. Бұған Трамптың Инфантиноға телефон соққанынан кейін шешім өзгерді деген пікірлер айтылды. АҚШ президенті кейін осының арқасында футболшы Бельгияға қарсы 1/8 финал матчына қатысқанын өзі де мәлімдеген.
Ал ФИФА бұл шешімді ұйымның тәуелсіз тәртіптік комиссиясы қабылдағанын айтып, қандай да бір сыртқы ықпал болғанын жоққа шығарды.
