Әл-Фарабидегі адам өліміне әкелген жол апаты: полицейге қатысты тергеу аяқталды

Адам өліміне әкелген негізгі жол апаты бойынша іс сотқа жолданған. Сонымен қатар Алматыда осы оқиғаға қатысты тағы екі қылмыстық іс тергеліп жатыр.

Істердің бірінде күдікті ретінде Алматы полиция департаменті басшыларының бірінің жүргізушісі болып істейтін полиция қызметкері өтіп жатыр. Оған Қылмыстық кодекстің 370-бабы 4-бөлігі 1-тармағы — «ауыр зардаптарға әкеп соққан қызметтегі әрекетсіздік» бойынша айып тағылған.

ІІМ мәліметінше, 20 мамыр күні Алматы полиция департаментінің қызметкеріне қатысты сотқа дейінгі тергеу аяқталған.

«Алматы ПД басшыларының бірінің жүргізушісі болып табылатын қызметкердің әрекетсіздігі кейін адам өліміне әкелген жол апатына себеп болды. Қазір қылмыстық іс материалдарымен танысу жүріп жатыр», – деп хабарлады министрлік.

Аталған бап бойынша жаза 7 жылға дейін бас бостандығын шектеуді немесе айыруды, мүлкін тәркілеуді және белгілі бір қызметпен өмір бойы айналысу құқығынан айыруды көздейді.

Алайда ІІМ істің нақты қашан сотқа жолданатынын нақтыламады.

Сонымен қатар министрлік тағы бір қылмыстық істі тергеп жатыр. Ол тыйым салынған сериядағы мемлекеттік нөмірлердің заңсыз берілуіне қатысты.

ІІМ-нің Өз қауіпсіздігі департаменті Қылмыстық кодекстің 362-бабы 1-бөлігі — «билікті немесе лауазымдық өкілеттіктерді асыра пайдалану» бойынша сотқа дейінгі тергеу жүргізіп жатыр.

Бұл бап бойынша 3000 АЕК-ке дейін айыппұл салу, 800 сағатқа дейін қоғамдық жұмысқа тарту немесе 3 жылға дейін бас бостандығын шектеу не айыру жазасы қарастырылған.

ІІМ бұл іс бойынша нақты кімнің күдікті екенін — полиция қызметкері ме, әлде басқа лауазымды тұлға ма — ашып айтпады.