Алматыда Наурызбай ауданының әкімдігі сел қаупіне байланысты тұрғындардың эвакуацияланбағанын мәлімдеді

Ведомствоның хабарлауынша, уақытша орналастыру пункттерін дайындау – қауіп төнген жағдайда әрекет ету алгоритмдеріне сәйкес қабылданған алдын алу шарасы ғана.

Хабарлау жүйесі іске қосылғанымен, уақытша орналастыру пункттеріне тұрғындар жүгінген жоқ. Қалалық қызметтер Төтенше жағдайлар департаментімен бірлесіп тәулік бойы жағдайды бақылап, Ақсай өзені бассейніндегі ахуалды қадағалап отыр. 

Әкімдік тұрғындарды сабыр сақтауға, тек ресми ақпарат көздеріне сенуге және расталмаған мәліметтерді таратпауға шақырды. Жағдай өзгерген жағдайда халыққа ресми арналар арқылы жедел хабарланатыны айтылды.