Әлімханұлы мен Юбинк кездесе ме?

Қазақстандық кәсіпқой боксшы Жәнібек Әлімханұлы британиялық кіші Крис Юбинкпен жұдырықтасуы мүмкін. Ол үшін кейінгісі келісімін беруі керек, - дейді Top Rank промоутерлік компаниясының президенті Тодд ДюБеф.

Жәнібек Әлімханұлының жекпе-жектерін ұйымдастыруға компания президенті атсалысуда. Сәйкесінше Жәнібек бұл айқасқа дайын екенін қадап айтты. Крис Юбинк те бұған дейін Әлімханұлымен жекпе-жекке шыққысы келетінін айтқан еді. Бірақ оның менеджерлері басқа боксшымен келіссөздер жүргізіп жатыр. Тіпті Бүкіләлемдік бокс ұйымы Жәнібек пен Кристі жолықтыру үшін британиялық боксшыны рейтингте көтеріп, бірінші орынға жайғастырды. 

Айта кетейік, Жәнібек бүгінге дейін 15 кездесу өткізіп, 15-інде де жеңіске жетті. Соңғы рет биыл қазан айында АҚШ-та жұдырықтасып, германиялық Винченцо Гуальтьериден басым түсті. Қазір Әлімханұлы WBO және IBF тұжырымдары бойынша орта салмақтағы әлем чемпионы саналады.