Атырауда экстремистік топ құрды деген күдікпен 10 адам ұсталды

ҰҚК мәліметінше, күдіктілер 30 қазанда прокуратура органдарының үйлестіруімен жүргізілген сотқа дейінгі тергеу аясында бір мезгілде ұсталған.

"2026 жылғы 30 қазанда Ұлттық қауіпсіздік комитеті прокуратура органдарының үйлестіруімен Атырау қаласында сотқа дейінгі тергеу аясында 10 адамды бір мезгілде ұстады. Олар экстремистік топ құруға, оған басшылық етуге және оның қызметіне қатысуға, сондай-ақ терроризмді насихаттауға және діни алауыздықты қоздыруға күдікті", – делінген ҰҚК хабарламасында.

Тергеу мәліметінше, күдіктілер Қазақстанның батыс өңірінде конституциялық құрылыс негіздерін күш қолдану арқылы өзгертуді жоспарлаған.

Күдіктілердің тұрғылықты мекенжайларында жүргізілген тінту барысында атыс қаруы, есірткі заттары, діни атрибутика, әдебиеттер және басқа да заттай дәлелдемелер табылып, тәркіленген.

Балаларға арналған үш жасырын оқу орталығы анықталды

ҰҚК тергеу барысында балалар мен жасөспірімдерді оқыту үшін құрылған делінген үш жасырын оқу орталығының қызметі тоқтатылғанын хабарлады.

Тергеу нұсқасы бойынша, бұл орталықтарды күдікті топтың мүшелері ұйымдастырған болуы мүмкін.

Сонымен қатар ұсталғандардың кейбірі бұған дейін террористік және жалпы қылмыстық сипаттағы құқық бұзушылықтар үшін қылмыстық жауапкершілікке тартылғаны белгілі болды.

Қазіргі уақытта іс бойынша сотқа дейінгі тергеу жалғасып жатыр.

ҰҚК Қылмыстық-процестік кодекстің 201-бабына сәйкес тергеудің өзге мәліметтері жария етілмейтінін хабарлады.