Әзербайжанда әйел адам намаз оқып отырған күйеуін пышақтап өлтірген
Әзербайжанның Абшерон ауданындағы Масазыр елді мекенінде ер адамның өліміне қатысты қылмыстық іс тергеліп жатыр. Полиция күдікпен марқұмның әйелін ұстаған.
Жергілікті ақпарат құралдарының мәліметінше, қайғылы оқиға Мурад Мирзоев көшесіндегі үйлердің бірінде болған. Алдын ала дерек бойынша, 1978 жылы туған Эльсафа Рагимов таңертең әйелімен жанжалдасып қалған.
Кейін ерлі-зайыпты арасындағы дау басылған. Рагимов намаз оқу үшін басқа бөлмеге кеткен сәтте әйелінің оның арқасына пышақ сұққаны және ер адамның сол жарақаттан көз жұмғаны айтылады.
Ерлі-зайыпты бұл үйде шамамен он жыл тұрған. Олардың екі баласы бар екені хабарланды. Сондай-ақ отбасы діндар болғаны айтылған.
Оқиға туралы полицияға алғаш болып осы аумақта жылжымайтын мүлікпен айналысатын риелторлар хабарлаған.
Полиция жүргізген жедел іс-шаралар барысында қылмыс жасады деген күдікпен 1983 жылы туған А. Алиева ұсталды. Ол тергеу органдарына тапсырылған.
Қазір оқиғаның барлық мән-жайын анықтауға бағытталған тергеу жүріп жатыр.
