Черногория Дина Таңсәріні экстрадициялаудан бас тартты

Бұл туралы ақпарат «НеМолчи» қорының Instagram парақшасында  жарияланды.

14 сәуір күні Дина Таңсәрі Черногорияның астанасы Подгорица қаласында ұсталып, уақытша ұстау изоляторына қамалған болатын. Оның айтуынша, полиция бөлімінде ол адвокатсыз және аудармашысыз тергеуге алынған. Ол қол қойған құжаттардың мазмұнын түсінбегенін де айтқан. Келесі күні, 15 сәуірде, Черногория соты оны қамауда ұстау немесе босату мәселесін қарады.

Сот шешімі

Сот отырысы жабық түрде өткен. Таңсәрінің адвокатының мәлімдеуінше, ол 2023 жылдың қазан айында Черногориядан босқын мәртебесін сұраған. Осы өтінішке байланысты Черногория билігі оған қатысты экстрадиция мәселесін қарауды уақытша тоқтатты. Қазіргі сот отырысында Динаның паспортын тәркілеу және оны бостандықта қалдыру туралы шешім шығарылды.

Дина Таңсәрінің үндеуі

Соттан шыққан соң ол өзінің жақтастарына алғыс айтып, Қазақстан билігі тарапынан қудалануының себебі — зорлық-зомбылыққа қарсы үнсіз қалмауы екенін мәлімдеді.

«Мені қудалаудың себебі — мен үнсіз қалмадым. Мен Қазақстанда бұрын-соңды болмаған қоғамдық серпіліс тудырдым. Сол үшін билік мені жазалағысы келеді», – деді Таңсәрі.

Айта кетейік, Динара Смаилова — Қазақстанда тұрмыстық және жыныстық зорлық-зомбылыққа қарсы күресіп жүрген белсенді. Ол негізін қалаған «НеМолчи.kz» қоры көптеген жәбірленушілерге заңдық және психологиялық көмек көрсетіп келеді.

2023 жылдың соңында Қазақстан билігі оны аса ірі көлемде алаяқтық жасады деген айыппен іздеуге жариялаған. 2024 жылдың желтоқсанында Өскемен соты сырттай қамауға алу туралы шешім шығарған болатын. Егер оның кінәсі дәлелденсе, 10 жылға дейін бас бостандығынан айырылуы мүмкін.

Черногория сотының бұл шешімі Дина Таңсәрі үшін уақытша жеңіс болып саналады. Алайда экстрадиция мәселесі әлі толық тоқтатылған жоқ. Босқын мәртебесіне байланысты шешім шыққанға дейін бұл сұрақ қайта қаралмайды.