Дональд Трамп Иранмен жаңа келісімге үміт артып отыр

Дональд Трамп жаңа келісім «бұрынғысынан әлдеқайда жақсы болады» деп мәлімдеді.

АҚШ делегациясы Иранмен жоспарланған келіссөздердің келесі кезеңі үшін жуық арада Пәкістанға барады. Бұл туралы 20 сәуір күні, АҚШ пен Израильдің Иранға қарсы соғысында жарияланған екі апталық бітімнің аяқталуына екі күн қалғанда AFP агенттігі хабарлады.

АҚШ президенті New York Post басылымына берген сұхбатында вице-президент Джей Ди Вэнс бастаған америкалық келіссөз жүргізушілер жолға шыққанын айтқан. Сонымен қатар, ол Truth Social желісіндегі жазбасында Иранмен жасалатын жаңа келісім 2015 жылы Тегеранмен қол жеткізілген халықаралық келісімнен әлдеқайда тиімді болатынына сенім білдірді.

Сонымен бірге, AFP атап өткендей, Исламабадтағы келіссөздерге Иран қатыса ма, жоқ па – бұл мәселе әлі анық емес.

Иран Сыртқы істер министрлігінің өкілі Исмоил Бақи: «Келіссөздердің екінші кезеңіне нақты жоспар жоқ, бірақ бұл мәселе толық шешілген жоқ», – деді.

Ол АҚШ-ты «дипломатияға байыппен қарамай отыр» деп айыптап, бітім режимін бұзды деп мәлімдеді. Оның айтуынша, бұған АҚШ-тың ирандық жүк кемесіне жасаған шабуылы мен ел порттарының қоршауда қалуы дәлел.

Дональд Трамптың сөзінше, бітімді ұзарту «іс жүзінде мүмкін емес». Ол 20 сәуірде, егер келісім жасалмаса, Иранға қарсы жаппай шабуылдар жасалатынын тағы да ескертті.

«Біз Тегеранға әділ әрі орынды келісім ұсынып отырмыз. Олар оны қабылдайды деп үміттенемін. Әйтпесе АҚШ Ирандағы барлық электр станциялары мен көпірлерді істен шығарады», – деді Трамп.

Бұған дейін Иран АҚШ ел порттарын Ормуз бұғазы арқылы қоршауды жалғастырып жатқан жағдайда Пәкістандағы келіссөздерге қатыспайтынын мәлімдеген еді.

Исламабадтағы кездесуден кейін тараптар делдалдар арқылы байланысын жалғастырғанымен, Иранның пікірінше, АҚШ-тың «шектен тыс талаптары» салдарынан диалог тұйыққа тірелген.

Айта кетейік, Вашингтон мен Тегеран арасындағы алғашқы келіссөз кезеңі 11-12 сәуір күндері Исламабадта өтіп, еш нәтиже бермеген.