Еуропаның 12 елі Украинаға әскер жіберу мүмкіндігіне дайындық ретінде Польшада оқу-жаттығу өткізеді
Ұлыбритания мен Франция Польшада өтетін халықаралық әскери оқу-жаттығуға жетекшілік етеді.
Жаттығудың мақсаты – Украинада бейбіт келісім жасалған жағдайда көпұлтты әскери контингентті орналастыруға дайындықты тексеру. Бұл туралы BBC жазды.
"Коалиция" (Koalicja) деп аталатын әскери оқу-жаттығу 9-22 қараша аралығында өтеді. Оған 12 елден шамамен 2800 әскери қызметші қатысады.
Қатысушылар қатарында Ұлыбритания, Франция, Германия, Польша, Литва, Эстония, Нидерланд, Бельгия, Испания, Швеция және Түркия бар.
Батыс елдері өкілдерінің түсіндіруінше, халықаралық күштер НАТО-ның қолбасшылығына бағынбайды. Сондай-ақ олар майдан шебіне орналастырылмайды және шабуылдау немесе бітімгерлік операцияларға қатыспайды.
Контингенттің негізгі міндеті – соғыс қимылдары тоқтағаннан кейін Украинаның қауіпсіздігін нығайтуға және қарулы күштерін қалпына келтіруге көмектесу.
АҚШ бұл бастаманы талқылауға қатысқанымен, әскери миссияға тікелей қатыспайды.
"Бұл жай ғана болжамға құрылған жоспар емес, соғыс қимылдары тоқтаған бойда Украинаға көмектесуге дайын нақты әскери күштер", – деп мәлімдеді Ұлыбританияның Қорғаныс министрлігі.
Әскери жаттығулар құрлықта, теңізде және әуеде өтеді. Қатысушы елдердің әскери бөлімдері логистика, жабдықтау жүйесі және өзара іс-қимыл мәселелерін пысықтайды.
Әуе кеңістігіндегі қауіпсіздік. Ұлыбритания Корольдік әскери-әуе күштерінің Typhoon жойғыш ұшақтары Украина әуе кеңістігін болашақта азаматтық авиация үшін қайта ашуға қажетті қауіпсіздік шараларын пысықтайды.
Қара теңіздегі қауіпсіздік. Түркияның жетекшілігімен әскери қызметшілер Қара теңіз акваториясын миналардан тазарту және сауда кемелерінің қауіпсіз қозғалысын қамтамасыз ету міндеттерін жаттықтырады.
Батыс елдерінің ресми өкілдері Украинаға орналастырылуы мүмкін халықаралық контингенттің түпкілікті құрамы мен саны соғысты тоқтату шарттарына және қатысушы мемлекеттер үкіметтерінің шешімдеріне байланысты болатынын атап өтті.
Ресей шетелдік әскердің Украинаға орналасуына қарсы
Ресей билігі бұған дейін Украина аумағына шетелдік әскери контингент орналастырылған жағдайда, оны заңды әскери нысана ретінде қарастыратынын мәлімдеген.
Ал Батыс елдерінің өкілдері халықаралық контингент құрамындағы әскери қызметшілердің өзін-өзі қорғау құқығы сақталатынын айтып отыр.
Әзірге Украинаға шетелдік әскерді орналастыру туралы түпкілікті шешім қабылданған жоқ. Мұндай миссияның жүзеге асуы ықтимал бейбіт келісімнің шарттарына байланысты болады.
