"Иран химиялық қару қолдануға дайындалып жатыр ма?": Израиль АҚШ-қа дабыл қақты
Израиль Иранның химиялық қару қолдануы мүмкін екенін айтып, АҚШ-ты ескертті.
Бұл туралы The New York Times (NYT) басылымы хабарлады.
Басылымның мәліметінше, Израиль барлау қызметі Тегеранның химиялық қаруды жеткізу тәсілдерін әзірлеп жатқанын анықтаған. Сондай-ақ Иран билігі мұндай қаруды қолдану мүмкіндігін қарастырып жатыр деген болжам бар.
Алайда АҚШ әкімшілігі өкілдерінің бұл мәселеге қатысты пікірі екіге бөлінді. Бір топ шенеунік Израиль ұсынған ақпаратты елеулі қауіп деп бағаласа, енді бірі мұндай мәлімдемелердің астарында саяси мақсат болуы мүмкін деп санайды.
Олардың пікірінше, Израиль премьер-министрі Биньямин Нетаньяху АҚШ президенті Дональд Трампты Иранға қарсы ауқымды әскери соққыларды қайта бастауға көндіруге тырысуы мүмкін.
Әзірге Иранның химиялық қару әзірлеп жатқаны немесе оны қолдануды жоспарлағаны туралы тәуелсіз растау жоқ. Сондықтан бұл ақпарат Израиль барлау қызметінің мәлімдемесіне және америкалық шенеуніктер арасындағы бағалауларға негізделген.
