Францияда тағы жаппай наразылық: 219 адам ұсталып, полициямен қақтығыс болды

Францияда билік саясатына қарсы жаппай наразылық шерулері қайта өтті. 14 қарашада Париж, Лион, Марсель және басқа қалаларда мыңдаған адам көшеге шықты. Кейбір өңірлерде шерушілер мен полиция арасында қақтығыс болып, 219 адам ұсталды.

Франция Ішкі істер министрлігінің мәліметінше, ел бойынша наразылық акцияларына шамамен 106 мың адам қатысқан.

Шерулердің негізгі себептері – қымбатшылық, жалақы мәселесі, білім беру саласындағы жағдай және полицияның күш қолдануына қарсылық.

Наразылық акцияларына кәсіподақ өкілдері, студенттер, «сары жилеттілер» қозғалысының мүшелері және түрлі қоғамдық ұйымдар қатысқан.

Кейбір қалаларда бейбіт шерулер тәртіпсіздікке ұласқан. Наразылық білдірушілер мен полиция арасында қақтығыстар болып, жекелеген жерлерде өрт қойылған, дүкендер мен қоғамдық мүлік бүлінген.

Ресми мәлімет бойынша, тәртіпсіздіктер кезінде 219 адам ұсталып, 10 полиция қызметкері жарақат алған.

Францияда әлеуметтік-экономикалық мәселелерге байланысты наразылықтар бірнеше аптадан бері жалғасып келеді.

Бұған дейін, 17 қазанда өткен шерулерге шамамен 565 мың адам қатысқаны хабарланған. Ал 14 қарашадағы акцияларға қатысушылар саны 106 мыңға дейін азайған.

Дегенмен наразылық қозғалысы толық тоқтаған жоқ. Шерушілер биліктен әлеуметтік мәселелерді шешуді және азаматтардың талаптарын ескеруді талап етіп отыр.