Хаменейдің өлімінен кейін Иранда билік үшін күрес күшейді – NYT
Иранның бұрынғы Жоғарғы көшбасшысы Әли Хаменейдің қазасынан кейін елде билік үшін күрес жаңа кезеңге өтті.
The New York Times басылымының Иран билігіндегі дереккөздерге сілтеме жасап хабарлауынша, қазіргі таңда түрлі саяси топтар жаңа Жоғарғы көшбасшы Можтаба Хаменейге ықпал ету үшін өзара тартысқа түскен.
Басылымның жазуынша, бір аптаға созылатын жерлеу рәсімі сырт көзге Иран билігінің бірлігін көрсеткенімен, оның тасасында терең саяси қайшылықтар жатыр.
Жерлеу рәсімінде президент Масуд Пезешкиан, парламент төрағасы Мохаммад Багер Галибаф, сот жүйесінің басшысы және Ислам революциясы сақшылар корпусының жоғары лауазымды қолбасшылары бірге көрінген. Алайда наурыз айында Жоғарғы көшбасшы болып тағайындалған Можтаба Хаменей көпшілік алдына шықпады.
NYT мәліметінше, дәл осы жоқтық Иранның саяси элитасы арасында елді шын мәнінде кім басқарып отыр деген сұрақтың туындауына себеп болған.
Газеттің дереккөздері соңғы апталарда АҚШ-пен келіссөздер мәселесіне байланысты билік ішіндегі тартыстың ашық сипат алғанын айтады. Жоғары лауазымды саясаткерлер бір-бірін сатқындыққа, төңкеріс жасауға ұмтылуға, жаңа Жоғарғы көшбасшыны өз мүддесіне пайдалануға және оның шешімдеріне ықпал етуге әрекеттенді деп айыптаған.
Тегеранда өткен митинг кезінде консервативті саясаткер Хасан Рахимпур-Азғади АҚШ-пен келіссөз жүргізуге қарсы шығып, кек алуға шақырды.
Сонымен қатар басылым Иран билігіндегі прагматикалық қанаттың құрамына президент Масуд Пезешкиан, парламент спикері Мұхаммад Бағер Ғалибаф және Ислам революциясы сақшылар корпусының бірқатар ықпалды генералдары кіретінін жазады. Бұл топ АҚШ-пен атысты тоқтату туралы келісім мен диалогты қолдайды.
Сарапшылардың пікірінше, алдағы уақытта Можтаба Хаменейдің сот жүйесіне, мемлекеттік телеарнаға, «Басидж» жасағына және қарулы күштердің жоғары басшылығына жасайтын кадрлық тағайындаулары оның қандай саяси бағытты ұстанатынын айқындайтын басты белгі болады.
Әли Хаменеймен қоштасу рәсімі 3–9 шілде аралығында бірнеше қалада өтеді. Жерлеу рәсімі оның туған қаласы – Мешһедте аяқталады. Бұған дейін Reuters агенттігі Можтаба Хаменейдің қауіпсіздік себептерімен көпшілік алдына шықпай жүргенін және оның жерлеу рәсіміне қатысуы да белгісіз екенін хабарлаған.
