Иран АҚШ-тың Иорданиядағы әскери базаларына соққы жасады
Иран АҚШ-тың Иордания аумағында орналасқан әскери нысандарына зымыранмен шабуыл жасады. Бұл туралы Иранның мемлекеттік ақпарат құралдары хабарлағанын BBC жазды.
Оқиға АҚШ әскери күштерінің Иран аумағындағы Ларак аралындағы зымыран ұшыру қондырғыларына соққы жасағаннан кейін болған. Алғашқы шабуылдан бірнеше адам қаза тауып, бірқатар адам жараланған.
Бұған жауап ретінде Тегеран Иорданиядағы «Король Хусейн» және «Аль-Азрак» әскери базаларына зымырандар ұшырған. Иран Ислам революциясы сақшылары корпусының мәлімдеуінше, шабуыл кезінде АҚШ әскерінің техникалық инфрақұрылымы мен жойғыш ұшақтары орналасқан позициялар нысанаға алынған. Иран тарапы америкалық нысандарға елеулі залал келгенін мәлімдеді.
Алайда Иордания қарулы күштері зымырандардың барлығы нысанаға жетпегенін хабарлады. Ел аумағына кірген сегіз зымыранның әуе шабуылына қарсы қорғаныс жүйелері арқылы қағып түсірілгені айтылды.
Шабуылға дейін АҚШ Орталық қолбасшылығының өкілі Тим Хокинс америкалық әскерилердің Иранға соққы жасағанын растаған. Оның сөзінше, АҚШ күштері Иран Ислам революциясы сақшылары корпусының Ормуз бұғазына қарай зымыран ұшыруға дайындалып жатқанын байқаған.
Бұл – АҚШ-тың шілде айының соңынан бері Иран аумағына жасаған алғашқы әскери соққысы.
АҚШ пен Иран арасындағы 60 күнге жоспарланған атысты тоқтату келісімінің мерзімі екі апта бұрын аяқталған болатын. Сол кезде АҚШ президенті Дональд Трамп келіссөздер жалғасып жатқанын айтқанымен, Иран талаптарға көнбеген жағдайда оның одақтастарына қарсы да әскери әрекет жасалуы мүмкін екенін ескерткен.
