Жазылу
«Ислам мемлекеті» ұйымына ант берген жігіт Тейлор Свифттің концертінде теракт жасамақ болған
Австрия полициясы америкалық әнші Тейлор Свифттің Венадағы концерті кезінде теракт жасамақ болған екі адамды ұстады. Бұл туралы Euronews хабарлады.
Венадағы Тейлор Свифттің үш концертін ұйымдастырушылар іс-шаралардың бірінде теракт жасауды жоспарлаған күдіктілердің ұсталғаны мәлім болған соң, концертті тоқтатты.
Свифт бейсенбі, жұма және сенбі күндері Австрия астанасындағы Эрнст Хаппель стадионында өнер көрсетуі керек еді.
Іс-шараны ұйымдастырушы Barracuda Music сәрсенбі күні кешке өзінің Instagram арнасында «барлығының қауіпсіздігі үшін жоспарланған үш концертті тоқтатудан басқа амал жоқ» деп мәлімдеді.
19 жастағы басты күдікті Венаның оңтүстігіндегі Терниц қаласында, екіншісі Австрия астанасында қамауға алынды, деп хабарлады Австрия билігі.
Австрия ішкі істер министрлігінің қоғамдық қауіпсіздік жөніндегі директоры Франц Руф биліктің ықтимал шабуылға «дайындық шаралары» туралы хабардар екенін және «19 жастағы жігіттің Венадағы Тейлор Свифттің концерттерін нысанаға алғанын» айтты.
Руфтың сөзінше, 19 жастағы жігіт "Ислам мемлекеті" тобына ант берген.
Австрия азаматы интернет арқылы "радикалданған" деген болжам бар. Одан химиялық заттар тәркіленіп, сараптама жүргізіліп жатқаны хабарланды.
