Қазақстан 2026-2028 жылдары жаңа кен орындарын іздеуге 40,7 млрд теңге жұмсайды
Қазақстанда жаңа кен орындарын анықтау мақсатында 2026-2028 жылдары геологиялық барлау жұмыстарына 40,7 млрд теңге бөлінеді.
Жоспар бойынша жыл соңына дейін зерттелген аумақтың көлемін 2,2 млн шаршы шақырымға жеткізу көзделіп отыр. Сонымен қатар 25 нысандағы геологиялық зерттеу жұмыстарын аяқтау жоспарланған.
Негізгі бағыттардың бірі – геологиялық түсірілім жұмыстарын неғұрлым егжей-тегжейлі жүргізу. Атап айтқанда, масштабы 1:50 000 болатын ГС-50 геологиялық түсіріліміне басымдық беріледі. Бұл жұмыстарға бөлінген 40,7 млрд теңгенің 32,7 млрд теңгесі жұмсалады. Қалған 8 млрд теңге сейсмобарлау жұмыстарына бағытталады.
Зерттеу барысында жердің тек беткі қабаты ғана қарастырылмайды. Сондай-ақ зертханалық және геохимиялық талдаулар жүргізіліп, ұңғымалар бұрғыланып, олардың құрылысы мен құрамы зерттеледі.
